Qərbi tənqid edənlərin uşaqları Avropada oxuyur
19 Sentyabr 2026 12:00 | Baxış sayı: 331
Rusiyanın hakim “Vahid Rusiya” partiyasının əsas rəhbərlərindən Vladimir Yakuşevin hər iki övladının Londonda təhsil aldığı məlum olub.
Yakuşevin oğlu Pavel əvvəlcə Tümen Dövlət Universitetini bitirib, daha sonra təhsilini London Biznes Məktəbində davam etdirib. O, sonradan özəl enerji şirkətində çalışıb, daha sonra investisiya və daşınmaz əmlak biznesi ilə məşğul olub.
Yakuşevin qızı Natalya da təhsil üçün Böyük Britaniyanı seçib. Məlumata görə, o, Londonda özəl məktəbdə oxuyub.
Vladimir Yakuşev isə 2024-cü ildən “Vahid Rusiya”nın Baş Şurasının katibidir. Bundan əvvəl Tümen vilayətinin qubernatoru, Rusiyanın tikinti və mənzil-kommunal təsərrüfat naziri, eləcə də Ural Federal Dairəsində prezidentin səlahiyyətli nümayəndəsi vəzifələrində çalışıb.
Hakim partiyanın yüksək vəzifəli təmsilçisinin övladlarının məhz Londonda təhsil alması Rusiya siyasi elitasının Qərbə qarşı sərt ritorikası ilə öz ailələri üçün etdiyi seçimlər arasındakı ziddiyyəti yenidən gündəmə gətirir.//musavat.com
