Azərbaycana bir neçə dəfə səfərlər etmiş Raşida Dati korrupsiya ittihamları ilə məhkəmə qarşısına çıxır

Raşida Dati Avropa Parlamentinin üzvü olduğu dövrdə "Renault-Nissan" avtomobil istehsalçısının maraqlarını lobbiçilik yolu ilə müdafiə etməkdə ittiham olunur.

Fransanın keçmiş mədəniyyət naziri Raşida Dati "Renault-Nissan" avtomobil istehsalı qrupu ilə əlaqəli korrupsiya ittihamları üzrə Parisdə məhkəmə qarşısına çıxıb.

60 yaşlı Dati Avropa Parlamentinin üzvü olduğu dövrdə "Renault-Nissan"ın Niderlandda yerləşən törəmə şirkətindən vəkil qonorarı adı ilə 900 000 avro (770 000 funt-sterlinq) məbləğində vəsait qəbul edərək qanunsuz lobbiçilik fəaliyyəti ilə məşğul olmaqda ittiham edilir. Məhkəmə həmin vəsaitin hansı məqsədlə ödənildiyini müəyyən etməlidir.

Datinin vəkilləri bütün korrupsiya ittihamlarını rədd edərək, onun "Renault-Nissan"ın törəmə şirkəti üçün "yalnız" vəkil qismində fəaliyyət göstərdiyini bildiriblər. Fransa prokurorları isə iddia edirlər ki, ona əslində avtomobil istehsalı qrupunun maraqları naminə lobbiçilik etməsi müqabilində ödəniş edilib; qeyd edək ki, lobbiçilik fəaliyyəti Avropa Parlamenti üzvləri üçün qadağandır. Prokurorlar Datinin həqiqətən hüquqi iş gördüyünü təsdiqləyən sübutların olmadığını bildiriblər.

Təqsirli bilinəcəyi təqdirdə, Dati 10 ilədək həbs və 450 000 avroyadək cərimə ilə üzləşə bilər. O, həmçinin beş il müddətinə dövlət vəzifəsi tutmaq hüququndan məhrum edilə bilər.

Datinin vəkilləri bildiriblər: “Avropa Parlamentində təsir imkanlarından sui-istifadə ilə bağlı əsassız ittihamlar prokurorluq tərəfindən uydurulmuş süni bir mülahizəyə əsaslanır.”//theguardian