Azərbaycandan 23,5 milyon ədəd siqaret çıxarılıb – Hara getdiyi bilinmir

Bu ilin ilk 7 ayı ərzində Azərbaycan xarici ölkələrə 31 milyon 80,1 min dollar dəyərində 1 milyard 912,2 milyon ədəd tərkibində tütün olan siqaretlər ixrac edib.
AJMEDİA açıqlanan rəsmi məlumatlara istinadən xəbər verir ki, ötən ilin eyni dövrü ilə müqayisədə ixrac olunan siqaretlərin miqdarı 532,7 milyon ədəd və ya 37,6% artıb.

Qeyd edək ki, xaricə satılan siqaretin bir qutusunun (20 ədəd) orta gömrük dəyəri 32,5 sent (55 qəpik) olub.

Azərbaycandan siqaret ən baha qiymətə Türkmənistana, ən ucuz qiymətə isə Suriyaya ixrac olunub. Türkmənistana göndərilən siqaretin bir qutusunun orta gömrük dəyəri 2,86 manat, Suriyaya göndərilən siqaretin bir qutusunun orta gömrük dəyəri isə 0,24 manat olub.

Bunlardan başqa, 23,5 milyon ədəd siqaretin hansı ölkəyə ixrac olunduğu açıqlanmayıb.

Bu ilin ilk 7 ayında Azərbaycan siqaretləri aşağıdakı ölkələrə satıb:

Gürcüstan – 1 milyard 659,45 milyon ədəd (bir qutusunun (20 ədəd) orta gömrük dəyəri 0,59 manat);
Qazaxıstan – 110 min ədəd (2,1 manat);
Qırğızıstan – 155,23 milyon ədəd (0,33 manat);
Özbəkistan – 27,02 milyon ədəd (0,26 manat);
Oman – 36,85 milyon ədəd (0,26 manat);
Suriya – 10 milyon ədəd (0,24 manat);
Türkmənistan – 10 min ədəd (2,86 manat);
Ölkə təyin olunmayıb – 23,51 milyon ədəd (0,42 manat).

Yeniavaz.com