Madyar Orbandan qisas alır?

Macarıstanın yeni hökuməti ölkənin əvvəlki rəhbərliyi dövründə bağlanmış və Avropada ən böyük hesab edilən 63 milyard avroluq kommersiya müqaviləsini ləğv etməyi planlaşdırır.

AJMEDİA xəbər verir ki, bu barədə baş nazir Peter Madyar məlumat verib. Söhbət 2022-ci ildə 35 il müddətinə imzalanmış və dəyəri 23 trilyon forint (təxminən 63 milyard avro) olan konsessiya sazişindən gedir. Müqaviləyə əsasən, ölkənin əsas avtomobil yolları "Magyar Koncesszios Infrastruktura Fejleszto" (MKIF) şirkətinin idarəçiliyinə verilməli idi.

Madyarın sözlərinə görə, aparılan yoxlamalar nəticəsində müqavilədə həm Macarıstan qanunvericiliyinin, həm də Avropa İttifaqı normalarının pozulduğu aşkar edilib. Buna görə də məsələ hüquq-mühafizə orqanlarına təqdim olunacaq. Nəqliyyat və investisiyalar naziri David Vitezi bu sazişi dövlət vəsaitlərinin mənimsənilməsi cəhdi kimi qiymətləndirib. O qeyd edib ki, sabiq baş nazirə yaxın iş adamlarına məxsus olan şirkətin yol şəbəkəsinin inkişafı üçün tələb olunan investisiyaları yatırmaq öhdəliyi müqavilədə öz əksini tapmayıb.

FİDES partiyasının parlament fraksiyası onlara qarşı irəli sürülən ittihamları rədd edərək, hazırkı Nazirlər Kabinetinin bu addımını siyasi qisas adlandırıb. Siyasətçilər həmçinin vurğulayıblar ki, müqavilənin imzalandığı vaxt indiki rəhbər şəxslər də yol təsərrüfatı ilə bağlı qurumlarda vəzifə tuturdular.

Operator şirkətin nümayəndələri də öz növbəsində bütün iddiaları təkzib ediblər. Onlar bildiriblər ki, bu razılaşma mürəkkəb iqtisadi vəziyyət dövründə avtomobil yolları infrastrukturunu işlək vəziyyətdə saxlamağa imkan yaradıb.

Xatırladaq ki, korrupsiyaya qarşı mübarizə apardığını bildirən Peter Madyarın sərvəti Viktor Orbandan on dəfə çox olub. 2025-ci ilin maliyyə hesabatlarına əsasən, Orban və həyat yoldaşının hesabında cəmi 25.6 min avro var və onların heç bir səhmi və ya qiymətli kağızı yoxdur. Madyar isə bəyannaməsində təxminən 250 min avro dəyərində aktivlər, həmçinin qiymətli kağızlar, depozitlər və fondlara edilən investisiyalar göstərib.//oxu.az