İran ABŞ və İsrailə məxsus kommersiya gəmilərinin satışa çıxarılacağı bildirilib

İran hakimiyyəti tərəfindən Fars körfəzi və Hörmüz boğazında müsadirə edilən ABŞ və İsrailə məxsus kommersiya gəmilərinin satışa çıxarılacağı bildirilib. Satışdan əldə olunan gəlirin müharibə zamanı zərər çəkən şəxslərin və həlak olanların ailələrinə yönəldiləcəyi açıqlanıb.

AJMEDİA xəbər verir ki, İran Məhkəmə Sisteminin yüksək vəzifəli rəsmisi Həsən Əbdülianpur bildirib ki, bir sıra ABŞ və İsrail gəmisi məhkəmə qərarları əsasında müsadirə edilib.

Onun sözlərinə görə, bu gəmilərin satışından əldə olunacaq vəsait son müharibədə zərər çəkən ailə və şəxslərin itkilərinin kompensasiya edilməsinə sərf olunacaq.

Əbdülianpur həmçinin ABŞ-ın hücumları nəticəsində Hörmüzqan əyalətində dəymiş ziyanın müəyyənləşdirilməsi üçün araşdırmaların aparıldığını bildirib. Onun sözlərinə görə, Kişm, Bəndər Ləngə və Cask bölgələrində indiyədək 537 zərər halı müəyyən edilib və bununla bağlı 100-dən çox məhkəmə işi açılıb.