“Azərsu” Abid Şərifova bağlılığı olan şirkətə 5,2 milyon manat ödəyəcək

İri Şəhərlərin Birləşmiş Su Təchizatı Xidməti (Keçmiş “Azərsu” ASC) “Avro-Asiya İnşaat Korporasiyası “Evrascon” ASC (VÖEN – 1000085511 ) ilə satınalma müqaviləsi imzalayıb.
AJMEDİA xəbər verir ki, müqavilə tender müsabiqəsi keçirilmədən, bir mənbədən satınalma metodu əsasında bağlanıb.

Müqavilənin şərtlərinə görə, “Avro-Asiya İnşaat Korporasiyası “Evrascon” ASC Xətai, Nizami, Binəqədi və Sabunçu rayonları, eləcə də Sumqayıt şəhər inzibati ərazilərində yerləşən kanalizasiya kollektorlarında baş vermiş qəzaların aradan qaldırılması üçün cari təmir və bərpa işlərini həyata keçirəcək. Görüləcək işlərin qarşılığnda İri Şəhərlərin Birləşmiş Su Təchizatı Xidməti ASC-yə 5 milyon 201 min 558 manat ödəyəcək.

Qeyd edək ki, nizamnamə kapitalı 377 min 290 manat olan “Avro-Asiya İnşaat Korporasiyası “Evrascon” ASC 2003-cü ildə dövlət qeydiyyatına alınıb. Hüquqi ünvanı “Yasamal rayonu, Qurban Xəlilov, ev 8”də yerləşən ASC-nin qanuni təmsilçisi İsmiyev Həmzət İsmayıl-Əfəndiyeviçdir. İsmiyev Həmzət “Avro-Asiya İnşaat Korporasiyası “Evrascon” ASC-nin direktorlar şurasının sədri İsmiyev İsmayıl-Əfəndi Hacımuradoviçin oğludur. 1955-ci ildə Dağıstan Respublikasında anadan olan İsmayıl İsmiyev 1978-ci il Saratov Politexnik İnstitutundan məzun olub.

Məlumat üçün bildirək ki, daha əvvəl yayılan məlumatlarda ASC-nin əsas səhmdarlarından (12%-dən çox paya sahib) birinin 1995-2018-ci illərdə Azərbaycanda Baş nazirin müavini olmuş Abid Şərifovun həyat yoldaşı Şərifova Sədayə Yaqub qızı olduğu qeyd olunub.//yeniavaz.com