Dövlət Ekoloji Ekspertiza Agentliyində Anım Günü ilə bağlı tədbir keçirildi

Dövlət Ekoloji Ekspertiza Agentliyində 27 Sentyabr – Anım Günü ilə əlaqədar tədbir təşkil olunub. Tədbirdə çıxış edən Agentliyin İdarə Heyətinin sədri Mirsalam Qənbərov 44 günlük Vətən müharibəsində Azərbaycan xalqının nümayiş etdirdiyi həmrəylik və Azərbaycan Ordusunun göstərdiyi qəhrəmanlıqdan danışıb. O, ərazi bütövlüyümüzün bərpası uğrunda canından keçən şəhidlərin xatirəsinin daim ehtiramla yad edildiyini bildirib. Çıxışda şəhidlərin fədakarlığının gələcək nəsillər üçün örnək olduğu vurğulanıb. Daha sonra şəhidlərin əziz xatirəsi bir dəqiqəlik sükutla yad edilib.

Tədbirdə 44 günlük Vətən müharibəsində iştirak etmiş Agentliyin əməkdaşı da çıxış edərək döyüşlər zamanı yaşadığı xatirələrdən və Azərbaycan əsgərinin göstərdiyi şücaətdən danışıb. O, Vətən müharibəsində qazanılan Zəfərin xalqımızın tarixində mühüm yer tutduğunu və şəhidlərin əziz xatirəsinin daim yaşadılmasının hər birimizin borcu olduğunu vurğulayıb.