Tramp, Əliyev və Paşinyan görüşündə üç sənəd imzalanacaq: Yəhudi mediası təfərrüatları təqdim edir

Donald Tramp, İlham Əliyev və Nikol Paşinyanla keçiriləcək görüşündə üç sənəd imzalanacaq.

Bu barədə AJMEDİA Amerikanın məhşur TV kanalına istinadən xəbər verir.

İlk sənədi xarici işlər nazirləri Ararat Mirzoyan və Ceyhun Bayramov imzalayacaq. Orada Ermənistan və Azərbaycan ATƏT-in Minsk Qrupundan birgə çıxmaq barədə razılığa gəlirlər.

İkinci sənədi Ermənistanın baş naziri Nikol Paşinyan və ABŞ prezidenti Donald Tramp imzalayacaq. Bu, Trampın marşrutu: Beynəlxalq Sülh və Rifah yolu (TRIPP) layihəsinə aid olacaq.

Sənəddə “dəhliz” sözü deyil, “yol” ifadəsi işlədiləcək.

Bu sənədlə Ermənistan və ABŞ bərabərhüquqlu tərəfdaşlardan ibarət “birgə müəssisə” yaratmağa razılaşırlar. Əgər Sünik yolunun ABŞ tərəfindən mümkün icarəsi əvvəllər müzakirə olunubsa, bu halda bu variant müzakirədən çıxarılır və erməni-amerikan sənədi tamamilə fərqli nizamlanmanı nəzərdə tutur.

Yol üzərində Ermənistanın suverenliyi və yurisdiksiyası qorunacaq, Ermənistanın ərazi bütövlüyü toxunulmaz olaraq qalacaq.

Ermənistan və ABŞ Ermənistanda qeydiyyatdan keçəcək, Ermənistan qanunvericiliyinə uyğun olaraq yaradılacaq və Ermənistan qanunvericiliyi çərçivəsində fəaliyyət göstərəcək birgə müəssisə yaradır. Əslində ABŞ Ermənistanda infrastrukturun yaradılmasına maliyyə sərmayələri qoyacaq. Ermənistan və ABŞ bu konsorsiumu birgə idarə edəcək. ABŞ erməni-amerikan konsorsiumunda iştirak edən tərəf kimi kommunikasiya infrastrukturunun yaradılması üzrə işləri tikinti təşkilatlarına həvalə etmək hüququna malik olacaq.

Bu işlərdə həm Amerika, həm də Ermənistan şirkətləri iştirak edə biləcəklər. Söhbət dəmir yolu və avtomobil infrastrukturunun yaradılmasından gedir. ABŞ maliyyə investisiyaları edəcək. Birləşmiş Ştatlar prosesin yeganə sahibi deyil, iştirakçısı kimi çıxış edir. Ermənistan və ABŞ-ın yaratdığı və hər iki ölkə tərəfindən bərabərlik prinsipləri əsasında idarə olunacaq konsorsium infrastruktur qurmaq hüququna malik olacaq. Bu, Ermənistan ərazisinə mülkiyyət hüququnun ABŞ-ın xeyrinə özgəninkiləşdirilməsi demək olmayacaq.

Əvəzində erməni-amerikan biznes konsorsiumu bu məqsədlər üçün ərazini icarəyə götürmək və tikinti işləri aparmaq hüququna malik olacaq. Bu o demək olacaq ki, Ermənistanın dövlət qurumları tikilən infrastruktura çıxış əldə edəcək. Bu infrastruktur birgə erməni-amerikan konsorsiumu tərəfindən qurulacaq və idarə olunacaq.

Birləşmiş Ştatlar bu infrastruktura qoşun və ya təhlükəsizlik qüvvələrini yerləşdirməyəcək, lakin ABŞ kommersiya nəqliyyatının hərəkətini təmin etmək üçün məsuliyyət daşıyacaq.

Üçüncü sənəd Ermənistanla Azərbaycan arasında sülh sazişi olmayacaq.

Ermənistan və Azərbaycanın xarici işlər nazirləri hər iki ölkənin sülh yolunda fəaliyyətini davam etdirəcəyini qeyd edən çərçivə sazişi imzalayacaqlar.

Üçüncü sənəddə Azərbaycan və Ermənistan öhdəlik götürür ki, imzalanandan sonra heç bir tərəf sülh sazişinin artıq razılaşdırılmış 17 maddəsindən imtina edə bilməyəcək. Onlar nəhayət razılaşdırılmış hesab ediləcək və əlavə dəyişikliklərə və ya imtinaya məruz qalmayacaqlar.