“HƏMAS a qarşı böyük uğurlar əldə etmişik - David Barux

“İsrail ordusu Qəzzada atəşkəs şəraitində HƏMAS-ın infrastrukturuna qarşı əməliyyatları davam etdirir”.

İsrailə ezam edilmiş əməkdaşı xəbər verir ki, bunu İsrail ordusunun sözçüsü, mayor David Barux jurnalistlərə açıqlamasında bildirib.

O qeyd edib ki, İsrail ordusu hazırda “sarı xətt” adlandırılan mövqelərə çəkilib və nəzarət etdiyi ərazilərdə mülki əhali yoxdur:

“Biz terror infrastrukturuna, xüsusilə tunellərə qarşı fəaliyyət göstəririk. Söhbət yüzlərlə kilometr uzunluğunda tunellərdən gedir. Bəzilərini əvvəlcədən bilirdik, digərlərini isə sonradan aşkarlamışıq. Bəzi tunellər bir neçə mərtəbə aşağıya doğru uzanır”.

David Baruxun sözlərinə görə, İsrail ordusunun mühəndis qüvvələri aşkarlanan tunellərin daxilində partlayıcı maddələr yerləşdirərək onları sıradan çıxarır:

“HƏMAS yenidən üzvlər cəlb edir və müəyyən uğurlar əldə edir. Təşkilat üç il əvvəlki gücdə olmasa da, hələ də İsrail üçün real təhlükə yaratmaq imkanına malikdir”.

O bildirib ki, İsrail siyasi və hərbi rəhbərliyin göstərişlərinə uyğun olaraq ABŞ Prezidenti Donald Trampın 20 bəndlik planını həyata keçirir:

“Növbəti mərhələdə Qəzzanın demilitarizasiyası və HƏMAS-ın tərksilah edilməsi gözlənilir. Plan çərçivəsində Qəzzaya gündə orta hesabla 600 humanitar yardım maşınının daxil olmasına imkan yaradılır. Son bir il ərzində bölgəyə 2 milyon ton humanitar yardım göndərilib”.

David Barux əlavə edib ki, tibbi səbəblərlə Qəzzadan digər ölkələrə getməli olan şəxslərin İsrail ərazisindən keçməsinə icazə verilir:

“Biz HƏMAS-la mübarizə aparmağa davam edirik. Hərbi baxımdan HƏMAS-a qarşı böyük uğurlar əldə etmişik, lakin təşkilat hələ də mövcuddur və müəyyən imkanlarını qoruyub saxlayır”.//525.az