Tramp administrasiyası üçün regionda ən etibarlı və əvəzolunmaz tərəfdaş Azərbaycandır - ŞƏRH

2025-ci il Azərbaycan üçün strateji cəhətdən çox önəmli bir il oldu. Hazırkı dövrdə ölkəmiz nəinki regionda, hətta qlobal miqyasda aktiv, təşəbbüskar və ciddi siyasi çəkiyə malik bir aktor kimi çıxış edir. Azərbaycan heç vaxt bu səviyyədə beynəlxalq siyasi mövqe və manevr imkanlarına malik olmayıb. Bu reallığın formalaşmasında Qarabağ zəfərinin rolu həlledici oldu.

AJMEDİA xəbər veri ki, bu fikirləri AZƏRTACA-a açıqlamasında siyasi şərhçi Nəzərbəy Hacıağayev deyib.

Onun sözlərinə görə, məhz Qarabağda əldə olunan Zəfər ölkəmizin təkcə ərazi bütövlüyünü deyil, eyni zamanda, dövlət suverenliyini tam şəkildə bərpa etməsi ilə nəticələndi və Azərbaycanın regional proseslərin obyektindən subyektinə çevrilməsini təmin etdi.

Nəzərbəy Hacıağayev bildirib ki, dünya siyasətinin ən güclü dövləti olan ABŞ-da Ağ Ev hər zaman qlobal qərarların mərkəzi kimi qəbul edilib. Lakin burada söhbət hər hansı administrasiyanı və ya siyasi xətti kor-koranə tərifləməkdən getmir.

“Məsələ ondan ibarətdir ki, demokrat administrasiyalara nisbətən daha praqmatik və real maraqlara söykənən respublikaçı yanaşma Azərbaycanın regionda formalaşdırdığı yeni siyasi reallıqları daha aydın oxuya bilir. Prezident Donald Trampın rəhbərlik etdiyi bu siyasi xətt üçün Azərbaycanın müharibədən sülhə keçid mərhələsində ortaya qoyduğu qətiyyət, sabitlik və etibarlı tərəfdaş modeli xüsusi əhəmiyyət kəsb edir. Məhz bu amillər Azərbaycan–ABŞ münasibətlərinin yeni mərhələyə yüksəlməsini şərtləndirən əsas faktorlardandır. Bu gün ABŞ üçün regionumuzda real alternativ yoxdur. Vaşinqton baxımından regionda alternativsiz, etibarlı və əvəzolunmaz tərəfdaş məhz Azərbaycandır. Bunun əsas səbəbi Azərbaycanın illərdir yürütdüyü balanslı və məsuliyyətli xarici siyasətdir. Azərbaycan nə regional münaqişələrin tərəfinə çevrilir, nə də hansısa blokun alətinə. Ölkəmiz hər kəslə müəyyən məsafəni qoruyan, eyni zamanda, dialoqu açıq saxlayan nadir dövlətlərdəndir. Bu balanslı xətt region üçün istisna nümunədir.

Bu gün Rusiya ilə bir sıra diplomatik çətinliklər, İranın dini elitası ilə müəyyən fikir ziddiyyətləri mövcuddur. Lakin buna baxmayaraq, Azərbaycan həm Rusiya ilə ali siyasi səviyyədə, həm də İranın hazırkı Prezidenti Məsud Pezeşkian səviyyəsində qarşılıqlı etimada əsaslanan münasibətləri saxlayır. Bu diplomatik bacarığı Gürcüstan həyata keçirə bilməz. Çünki Rusiya ilə münasibətləri o səviyyədə formalaşmayıb. Ermənistan isə Türkiyə ilə münasibətlərinin hazırkı vəziyyətinə görə belə bir rolu yerinə yetirmək imkanına malik deyil. Nəticə etibarilə, regionda etibarlı körpü funksiyasını icra edə bilən yeganə ölkə Azərbaycandır”, - deyə siyasi şərhçi vurğulayıb.

Azərbaycanın Mərkəzi Asiya dövlətləri arasında da ciddi nüfuza malik olduğunu xatırladan Nəzərbəy Hacıağayev Türk dünyasının hazırda Tramp administrasiyasının diqqətini cəlb edən mühüm geosiyasi mərkəzlərdən biri olduğunu, Azərbaycanın həmin xəttin əsas dayağı kimi çıxış etdiyin ifadə edib: “Məhz bütün bu amillər Azərbaycanı ABŞ üçün regionda əvəzolunmaz tərəfdaşa çevirən əsas proseslər sırasındadır. Burada Azərbaycan Prezidentinin şəxsi nüfuzu və siyasi imici də böyük rol oynayır. Prezidentimizin ABŞ tərəfindən etibarlı və nüfuzlu tərəfdaş kimi qəbul olunması, onun regiondakı rolu və Azərbaycanın geosiyasi çəkisinin Tramp administrasiyası tərəfindən yüksək qiymətləndirilməsini açıq şəkildə göstərir. Məhz buna görə də 2025-ci il Azərbaycan–ABŞ əlaqələrinin strateji tərəfdaşlıq səviyyəsinə yüksəldiyi tarixi dönüş ilidir. Bütün sadaladıqlarımızın fonundan isə bu heç də təsadüfi deyil”.