Ən çox şikayət olunan sığorta şirkətləri – SİYAHI

Azərbaycan Mərkəzi Bankı 1 sentyabr 2025-ci il – 31 avqust 2026-cı il dövrü üzrə avtomobil sahiblərinin icbari sığortası üzrə sığorta şirkətlərinin şikayət indeksini açıqlayıb. Ən yüksək şikayət indeksi “Xalq Sığorta” ASC-də qeydə alınıb və 1,70 təşkil edib.

“Meqa Sığorta” ASC 1,29 indekslə ikinci sıradadır.

Mərkəzi Bankın metodologiyasına görə, şikayət indeksi sığortaçının avtomobil icbari sığortası üzrə aldığı şikayətlərin bazar payının həmin şirkətin bağladığı müqavilələr üzrə bazar payına nisbəti əsasında hesablanır. İndeksin 1,00-dan aşağı olması həmin portfel üzrə xidmət səviyyəsinin digər şirkətlərlə müqayisədə daha yaxşı olduğunu, 1,00-dan yuxarı olması isə daha aşağı olduğunu göstərir. Buna görə, cədvəldə yaşıl rənglə göstərilən şirkətlərdə indeks orta göstəricidən aşağı, qırmızı rənglə göstərilənlərdə isə yuxarıdır.

Mərkəzi Bank bildirir ki, şikayət indeksi sığorta şirkətinin maliyyə dayanıqlılığına və ya fəaliyyətinin davamlılığına təhlükə yaratdığı anlamına gəlmir. Göstərici əsasən vətəndaşlara avtomobil icbari sığortası üzrə xidmət seçimi zamanı əlavə məlumat vermək məqsədilə hesablanır.

Hesablamada aktiv lisenziyası olan sığorta şirkətləri ilə bağlı daxil olan şikayətlər nəzərə alınıb. Avtomobil icbari sığortası növünün aparılması üzrə verilmiş icazəsi ləğv edilərək lisenziyasının qüvvəsi məhdudlaşdırılmış və ya lisenziyası ləğv olunmuş şirkətlərlə bağlı şikayətlərin təhlili isə Mərkəzi Bank tərəfindən əvvəlki qaydada davam etdirilir.//modern.az