Rusiyanın ikinci böyük bankında qohumbazlıq skandalı

Rusiya dövlətinə məxsus iri banklardan biri olan VTB-nin çoxillik rəhbəri Andrey Kostin haqqında yeni araşdırma bank daxilində genişmiqyaslı qohumbazlıq sxeminin mövcud olduğunu üzə çıxarıb.

AJMEDİA.NEWS xəbər verir ki, “Proyekt” jurnalistlərinin apardığı təhqiqat maraqlı faktları ortaya çıxarıb.

Məlumata görə, Kostin 23 il ərzində bank strukturlarına azı səkkiz yaxın qohumunu yerləşdirib və ailənin ümumi maliyyə dövriyyəsi milyardlarla rubl səviyyəsinə çatıb.

Ailə üzvləri yüksək vəzifələrdə

Araşdırmaya görə, Kostinin vətəndaş nikahında olduğu həyat yoldaşı Nailə Əskərzadə illər boyu VTB-lə bağlı sənədlərdə bank rəhbərinin köməkçisi kimi keçib. O, həmçinin VTB və bankın top-menecerləri tərəfindən verilən bir çox daşınmaz əmlakı əldə edib. 2020-ci ildə isə “VTB Kapital Broker” vasitəsilə 707 milyon rubl gəlir götürüb. Bununla yanaşı, Əskərzadənin müxtəlif banklardakı hesablarında 2024-cü ildə təxminən 2,8 milyard rubl olduğu iddia edilir. Onun rəsmi jurnalist gəliri isə cəmi 5,5 milyon rubl təşkil edib.

Nailə Əskərzadənin bacısı İnarə Əskərzadə də eyni şəkildə VTB ilə bağlı tədbirlərdə Kostinin köməkçisi kimi göstərilib və “VTB Kapital”da menecer kimi gəlir əldə edib.

Bank rəhbərinin böyük oğlunun dul həyat yoldaşı Marina Kostina (Yatsenko) 2021-ci ildə “VTB Aktivlərin İdarə Edilməsi” departamentində çalışıb. Marinanın bacısının həyat yoldaşı Andrey Serebryakov isə bir müddət VTB-nin Kipr filialına rəhbərlik edib, daha sonra Kiprdə VTB-nin investisiya qoyduğu fond yaradıb və bankın Britaniya törəməsinə rəhbərlik edib. Onun Xorvatiya vətəndaşlığı olduğu bildirilir.

Marinanın atası Vladimir Yatsenko da 2002-ci ildən bəri VTB-də yüksək vəzifələr tutub və hazırda “Poçt Bank”ın vitse-prezidentidir.

Kostinin qardaşı oğlu Sergey Kostin 2020-ci ildən “VTB Kapital”ın icraçı direktoru vəzifəsini tutur. O, 2024-cü ildə Vanuatu pasportu alıb. Sergey Kostinin həyat yoldaşı Olqa Bavykina isə 2008-ci ildən eyni struktura bağlı idarəedici direktor kimi fəaliyyət göstərir. Olqanın keçmiş həyat yoldaşı, tanınmış bankir Aleksey Zabotkin isə əvvəllər “VTB Kapital”da yüksək vəzifələr tutub, boşandıqdan sonra Rusiya Mərkəzi Bankına keçib və hazırda sədr müavini postunu icra edir.

Silovik elitasının nümayəndələri də VTB-də yerləşdirilib

Araşdırmada qeyd olunur ki, bankın rəhbər heyətində və törəmə şirkətlərində uzun illər ərzində təhlükəsizlik orqanlarına bağlı yüksək vəzifəli şəxslər və onların ailə üzvləri də yer alıb. Onların arasında:

• Denis Bortnikov, FSB direktoru Aleksandr Bortnikovun oğlu və VTB idarə heyəti sədrinin müavini,
• Bortnikovun həyat yoldaşı Darya Fedosova — illik təqribən 500 milyon rubl gəlir,
• FSB generalı Sergey Besedanın həyat yoldaşı,
• SVR rəhbəri Sergey Narışkinin qohumu,
• keçmiş baş nazir Sergey Stepashinin həyat yoldaşı,
• FSB general-polkovniki Sergey Şişin (ehtiyatda),

və digər silovik ailələrinin nümayəndələri var.

Nomenklatura ailələrinin “VTB karyerası”

Bankda müxtəlif illərdə Rusiyanın siyasi və iqtisadi elitasına aid digər şəxslərin qohumları da çalışıb:

• gələcək baş nazirin müavini Dmitri Patruşev,
• Federasiya Şurasının sədri Valentina Matviyenkonun oğlu Sergey,
• Prezident Administrasiyasının rəhbər müavininin kürəkəni,
• Mərkəzi Bank rəhbəri Elvira Nabiullinanın gəlini,
• İqtisadi İnkişaf Nazirliyinin yüksək ranqlı məmurlarının qohumları,
• Vladimir Putinin dayısı oğlunun oğlu Viktor Xmarin-kiçik,
• və digər onlarca elita nümayəndəsi.