Rusiya millətçiləri Qod Nisanova qarşı kampaniya başlatdılar

Rusiyada müxalif fəal Andrey Pivovarovun Sankt-Peterburqda “Fəxri xeyriyyəçi” adına layiq görülən azərbaycanlı iş adamı Qod Nisanovla bağlı paylaşımı geniş müzakirələrə səbəb olub.

AJMEDIA.NEWS xəbər verir ki, Pivovarov sosial şəbəkədəki statusunda qərarı sərt tənqid edərək yazıb ki, şəhər parlamenti bu mükafatı təsis edib və ilk olaraq məhz “Sadovod” və “Food City” bazarlarının sahibi Qod Nisanovu seçib. O, bildirib ki, Nisanovun varlı və təsirli şəxs olduğu bəllidir, Azərbaycan diasporunun qubernator Aleksandr Beqlova yaxınlığı da sirr deyil, lakin buna baxmayaraq, şəhərdə kifayət qədər xeyriyyəçi olduğu halda məhz onun seçilməsi doğru deyil.

Pivovarov daha da irəli gedərək qeyd edib ki, Sankt-Peterburq parlamenti son illərdə tamamilə dəyişib və əvvəlki kimi alternativ fiqurlar artıq ora buraxılmır. Onun sözlərinə görə, qəbul edilən qərar hətta hakim “Yedinaya Rossiya” daxilində belə narazılıq doğurur və “utancverici” hesab oluna bilər. O, əlavə edib ki, Valentina Matvienkonun dövründə belə hallara rast gəlinmirdi.

Qeyd edək ki, Andrey Pivovarov Rusiyada müxalif düşərgəyə aid siyasi fiqur kimi tanınır və tez-tez hakimiyyətə qarşı sərt tənqidi mövqeyi ilə çıxış edir.

Lakin məsələ bununla bitmir. Son dövrlərdə Rusiyada bəzi dairələr tərəfindən azərbaycanlı iş adamlarına və ümumilikdə Azərbaycan diasporuna qarşı açıq şəkildə hiss olunan neqativ münasibət diqqətdən qaçmır. Qod Nisanov kimi həm Rusiyada, həm də Azərbaycanda böyük biznes qurmuş bir şəxsin məhz bu cür hədəfə alınması təsadüfi görünmür.

Aydın görünür ki, bəzi çıxışlarda məsələ obyektiv qiymətləndirmədən daha çox fərqli – bəzən isə açıq millətçi prizma ilə təqdim olunur. Bu isə artıq təkcə bir mükafatın müzakirəsi deyil, daha geniş kontekstdə azərbaycanlı iş adamlarına qarşı formalaşan münasibətin göstəricisi kimi çıxış edir.

Bu yanaşma onu göstərir ki, bəzi dairələr Azərbaycandan olan iş adamlarının uğurlarını və onların xeyriyyə fəaliyyətlərinə görə təltif olunmasını həzm etmək istəmir. Halbuki Qod Nisanov həm Azərbaycanda, həm də Rusiyada böyük biznes quraraq iqtisadi mühitə real töhfə verən fiqurlardandır.

Belə ritorika isə təkcə bir şəxsi deyil, ümumilikdə Azərbaycan diasporunu hədəfə alan təhlükəli tendensiyanın formalaşdığını göstərir.