Qışın ən faydalı meyvəsi – Virusdan qoruyur, öskürəyi azaldır

Qış mövsümündə immunitetin zəifləməsi fonunda mütəxəssislər təbii vasitələrə üstünlük verməyi tövsiyə edirlər. Bu dövrdə ən faydalı meyvələrdən biri məhz heyvadır.

Heyva C vitamini ilə zəngindir və bu xüsusiyyəti sayəsində orqanizmi virus və soyuqdəyməyə qarşı daha davamlı edir. Xüsusilə mövsümi xəstəliklərin artdığı aylarda heyva təbii qoruyucu rol oynaya bilər.

Mütəxəssislərin sözlərinə görə, heyva boğaz ağrısı və öskürək zamanı da faydalıdır. Qaynadılmış heyva və ya heyva çayı boğazı yumşaldır, qıcıqlanmanı azalda bilər.

Bundan əlavə, heyva həzm sisteminə müsbət təsir göstərir. Tərkibindəki lif bağırsaqların fəaliyyətini yaxşılaşdırır, mədə turşuluğunu tənzimləməyə kömək edir. Antioksidantlarla zəngin olması isə dərinin sağlam qalmasına dəstək verir.

Mütəxəssislər heyvanın həm çiy, həm bişmiş, həm də kompot və ya çay formasında istifadə oluna biləcəyini qeyd edirlər. Onların fikrincə, qış rasionuna bu meyvəni əlavə etmək ümumi sağlamlıq üçün faydalı seçimdir.