Pentaqon rəhbərliyinə namizəd ola biləcək şəxsin adı açıqlandı

ABŞ administrasiyasında bir neçə aydır səssiz şəkildə ABŞ-nin hazırkı müdafiə naziri Pit Heqsetin əvəzlənməsi məsələsi müzakirə olunur və potensial namizəd kimi Quru Qoşunları naziri Daniel Driskollun adı keçir.

AJMEDİA.NEWS xəbər verir ki, bu barədə "CNN" məlumat yayıb.

Telekanalın məlumatına görə, Driskollun Ukrayna münaqişəsinin sülh yolu ilə həlli üzrə səylərdə qeyri-adi rolu onun Pentaqon rəhbərliyinə gətirilə biləcəyi ilə bağlı ehtimalları yenidən gücləndirib. Mənbələr bildirir ki, bu məsələ ABŞ administrasiyasında bir neçə aydır qeyri-rəsmi şəkildə gündəmdədir.

Məlumata görə, prezident Donald Tramp Driskolla xüsusi simpatiya bəsləyir və Ukrayna böhranının həlli ilə bağlı onun fikirlərinə mütəmadi olaraq maraq göstərir. ABŞ lideri həmçinin Driskollu “dronlara cavabdeh şəxs” adlandırır, çünki o, Pentaqonun pilotsuz uçuş aparatlarının inkişafı istiqamətinə də nəzarət edir.

Quru Qoşunları naziri daha əvvəl Kiyevdə Ukrayna prezidenti Volodimir Zelenski ilə görüşüb və ABŞ-Ukrayna danışıqları çərçivəsində Cenevrədə keçirilən müzakirələrdə iştirak edib.