Mesajlarınız doğrudanmı qorunur? - WhatsApp-ın “gizli” zəif nöqtəsi

Son dövrlərdə messencer təhlükəsizliyi ilə bağlı müzakirələr yenidən gündəmə gəlib və istifadəçilərin ən çox güvəndiyi platformalardan biri olan WhatsApp ilə bağlı diqqətçəkən iddialar irəli sürülür.

AJMEDIA.NEWS xəbər verir ki, ekspertlər bildirir: tətbiqdə “uçdan-uca şifrələmə” (E2E) standart olaraq aktiv olsa da, bu qoruma mexanizmi ehtiyat nüsxələrə tam şəkildə şamil edilmir.

İddialara görə, istifadəçilərin yazışmaları Apple və Google serverlərində saxlanılan ehtiyat nüsxələrdə şifrələnməmiş formada qala bilər. Bu isə o deməkdir ki, əsas mesajlaşma prosesi qorunsa belə, buludda saxlanılan məlumatlar potensial risk altında olur.

Mütəxəssislər qeyd edir ki, ehtiyat nüsxələrin şifrələnməsi funksiyası mövcuddur, lakin bu seçim istifadəçilər tərəfindən ayrıca aktiv edilməlidir və çoxları bundan istifadə etmir. Daha bir mühüm məqam isə ondan ibarətdir ki, hətta bir istifadəçi öz ehtiyat nüsxələrini qorusa belə, yazışdığı digər şəxslərin bunu etməməsi ümumi təhlükəsizliyi zəiflədir.

Bundan əlavə, qeyd olunur ki, platforma istifadəçilərin kimlərlə əlaqə saxladığına dair metadata toplayır və bu məlumatlar hüquqi sorğular çərçivəsində açıqlana bilər.

Alternativ kimi tez-tez Telegram göstərilsə də, ekspertlər xatırladır ki, bu tətbiqdə yalnız “gizli çatlar” tam şifrələnir, adi yazışmalar isə fərqli sistem əsasında qorunur.

Mütəxəssislər istifadəçilərə təhlükəsizlik parametrlərini yoxlamağı, ehtiyat nüsxələrin şifrələnməsini aktiv etməyi və güclü parollardan istifadə etməyi tövsiyə edir.