Kadırovun Putindən gözləntisi: "Təklif edərsə, hazıram"

Çeçenistan rəhbəri Ramzan Kadırov 2026-cı ildə keçiriləcək respublika başçısı seçkilərində iştirak etməyə hazır olduğunu bildirib.

AJMEDİA.NEWS-un məlumatına görə, o qeyd edib ki, bu qərar yalnız Rusiya Prezidenti Vladimir Putinin təklifi və dəstəyi olacağı halda mümkündür.

Kadırovun sözlərinə görə, o, indiyədək tutduğu bütün vəzifələrdə dövlət başçısının etimadını əsas meyar hesab edib və gələcək planlarını da məhz bu prinsip üzərində qurur. “Əgər Prezident hesab etsə ki, bu vəzifədə qalmalıyam və namizədliyimi irəli sürməyimi məqsədəuyğun saysa, mən hazıram”, – deyə Çeçenistan rəhbəri vurğulayıb.

Xatırladaq ki, Ramzan Kadırov 2007-ci ildən Çeçenistana rəhbərlik edir və regionun siyasi həyatında əsas fiqur olaraq qalır. 2026-cı ildə Çeçenistanda növbəti rəhbər seçkilərinin keçirilməsi nəzərdə tutulur.