İsrail Qəzzaya humanitar yardımın çatdırılması üçün nəzarət-buraxılış məntəqəsini açdı

İsrail Qəzzanın şimal hissəsinə humanitar yardımın çatdırılması üçün "Zikim" nəzarət-buraxılış məntəqəsini yenidən açıb.

AJMEDİA.NEWS-un "The Times of Israel"ə istinadən verdiyi məlumata görə, məntəqənin açılması sayəsində Qəzza ilə sərhəddə hazırda üç buraxılış məntəqəsi fəaliyyət göstərir.

Ərazilərdə Hökumətin Fəaliyyətinin Koordinasiya İdarəsindən (COGAT) bildirilib ki, nəzarət-buraxılış məntəqəsinin açılması haqqında qərar İsrailin siyasi rəhbərliyinin təsdiqi ilə qəbul edilib. Məntəqədən keçən yardım lazımi təhlükəsizlik yoxlamalarından sonra BMT və beynəlxalq təşkilatlara təhvil veriləcək.

Qeyd edək ki, "Zikim" nəzarət-buraxılış məntəqəsi Qəzza şəhəri üzərində nəzarəti bərqərar etməyə yönəlmiş əməliyyat çərçivəsində sentyabrın 12-də bağlanmışdı.