İsrail hökuməti Netanyahunun HƏMAS-ı ləğv etmək planını təsdiqləyib

İsrailin hərbi-siyasi kabineti baş nazir Benyamin Netanyahunun HƏMAS-ı tamamilə məğlub etmək və Qəzza zolağına nəzarəti bərqərar etmək planını dəstəkləyib.

Musavat.com xarici mediaya istinadla xəbər verir ki, sənəddə beş əsas məqsəd var: HƏMAS-ın tərksilah edilməsi, bütün girovların (o cümlədən ölənlərin cəsədlərinin) qaytarılması, Qəzza zolağının tamamilə demilitarizasiyası, ərazidə təhlükəsizliyə İsrail nəzarətinin təmin edilməsi və HƏMAS və Fələstin Muxtariyyəti ilə əlaqəsi olmayan yeni mülki administrasiyanın formalaşdırılması.

İsrail müdafiə qüvvələri Qəzzaya nəzarəti ələ keçirmək niyyətindədir. Həmçinin aktiv döyüş əməliyyatları zonasından kənarda olan mülki şəxslərə humanitar yardımın göstərilməsi də nəzərdə tutulur.

İsrail Nazirlər Kabinetinin məlumatına görə, iclasda iştirak edənlərin əksəriyyəti alternativ planı rədd edərək, bunun qarşıya qoyulan məqsədlərə nail olmayacağını bəyan ediblər.