"İranın nüvə texnologiyasından dinc məqsədlər üçün istifadə hüququ var" - Putin

İranın mülki nüvə proqramını inkişaf etdirmək və nüvə texnologiyasından dinc məqsədlər üçün istifadə etmək hüququ var.

AJMEDİA.NEWS apa-ya istinadən xəbər verir ki, bunu Rusiya Prezidenti Vladimir Putin “Sky News Arabia” telekanalına müsahibəsində deyib.

Onun sözlərinə görə, İranın nüvə texnologiyasından dinc məqsədlər üçün istifadə hüququ var: “Rusiya dinc nüvə enerjisinin inkişafında İrana “əvvəlki illərdə olduğu kimi lazımi yardım və dəstəyi” göstərməyə hazırdır”.

Putin qeyd edib ki, Rusiya nüvə silahının yayılmaması ilə bağlı mövqeyinə sadiq qalır: “Rusiya Federasiyasının mövqeyi ondan ibarətdir ki, biz kütləvi qırğın silahlarının dünyanın istənilən ölkəsinin, o cümlədən İranın hesabına yayılmasının əleyhinəyik”.

O vurğulayıb ki, Atom Enerjisi üzrə Beynəlxalq Agentliyində (AEBA) İranın nüvə silahı yaratmaq cəhdləri barədə məlumat yoxdur: “İran dəfələrlə bəyan edib ki, nüvə silahı yaratmaq niyyətində deyil. AEBA-da da nüvə silahının yaradılmasına dair heç bir əlamət və buna dair heç bir sübut yoxdur”.

Putin onu da deyib ki, İranda bu ölkənin nüvə silahına malik olmasını qadağan edən fətva böyük əhəmiyyət kəsb edir.