Heydər Əliye həsr olunan tədbir keçirildi – FOTOLAR

Bakıda Ümummilli Lider Heydər Əliyevin anadan olmasının 103-cü ildönümü və Müstəqillik Gününə həsr olunmuş geniş tədbir keçirilib.

Tədbirdə dövlət və ictimai xadimlər, millət vəkilləri, ziyalılar, media nümayəndələri və gənclər iştirak ediblər. Tədbir iştirakçıları əvvəlcə Ümummilli Lider Heydər Əliyevin əziz xatirəsini ehtiramla yad ediblər.

Tədbirdə sabiq təhsil naziri Misir Mərdanov, Bakı Dövlət Universitetinin sabiq rektoru Abel Məhərrəmov, millət vəkilləri Ceyhun Məmmədov və Günay Ağamalı, eləcə də elm və ictimaiyyət nümayəndələri iştirak ediblər.

Mərasim çərçivəsində Ümummilli Lider Heydər Əliyevin həyat və siyasi fəaliyyətindən bəhs edən qısa sənədli film nümayiş olunub. Filmdə Heydər Əliyevin Azərbaycan dövlətçiliyinin möhkəmləndirilməsi, müstəqilliyin qorunması, milli birlik ideyasının formalaşdırılması və ölkənin beynəlxalq nüfuzunun artırılması istiqamətində gördüyü işlər əks olunub.

Daha sonra çıxış edən natiqlər Heydər Əliyevin Azərbaycan tarixindəki müstəsna rolundan danışıblar. Bildirilib ki, Ulu Öndərin müəyyən etdiyi siyasi kurs bu gün Prezident İlham Əliyev tərəfindən uğurla davam etdirilir və Azərbaycan regionun güclü dövlətlərindən birinə çevrilib.

ADPU-nun Beynəlxalq Əlaqələr üzrə prorektoru, filologiya elmləri doktoru, professor Mahirə Nağıqızı çıxışında Heydər Əliyevlə bağlı xatirələrini bölüşərək onun Azərbaycan təhsilinə, elm və ziyalılara hər zaman xüsusi diqqət göstərdiyini vurğulayıb. O qeyd edib ki, Heydər Əliyevin milli ideologiya və dövlətçiliklə bağlı fikirləri bu gün də aktuallığını qoruyur və gənc nəslin vətənpərvər ruhda yetişməsində mühüm rol oynayır.

Digər çıxış edənlər də Ulu Öndərlə bağlı xatirələrini bölüşərək onun siyasi uzaqgörənliyindən, qətiyyətindən və Azərbaycan xalqına bağlılığından danışıblar. Tədbirdə həmçinin Müstəqillik Gününün tarixi əhəmiyyətinə diqqət çəkilərək Azərbaycanın müstəqilliyinin qorunmasının və gücləndirilməsinin vacibliyi vurğulanıb.

Tədbirin təşkilatçıları Ana Vətən Partiyasının sədri, millət vəkili Günay Ağamalı, Sirkətlər Qrupunun rəhbəri Vüqar Poladov “Zirvə” İslahatlara Dəstək Mərkəzi İB-nin sədri Elçin Axundzadə və professor Mahirə Nağıqızı olublar.

Qeyd edək ki, tədbir iştirakçıları Heydər Əliyevin dövlətçilik irsinin gələcək nəsillərə çatdırılmasının vacibliyini xüsusi vurğulayıb, onun Azərbaycan tarixində əbədi iz qoyan lider kimi daim ehtiramla yad ediləcəyini bildiriblər.