Gürcüstanda nazirlər və millət vəkilləri nə qədər maaş alır?

Gürcüstan Parlamenti 2026-cı il dövlət büdcəsini təsdiqləyib və yeni büdcəyə əsasən dövlət sektorunda çalışan 117 min dövlət qulluqçusunun əməkhaqqı 10% artırılacaq.
AJMEDİA xəbər verir ki, artım həm icra hakimiyyəti, həm də parlamentdə ən yüksək siyasi vəzifələri tutan şəxslərə şamil ediləcək.

Qeyd olunur ki, dövlət qulluqçularının maaşları əsas əməkhaqqına və həmin vəzifə üçün müəyyən olunan əmsala görə hesablanır. 2025-ci ildə 1 460 lari olan əsas əmək haqqı 2026-cı ildə 1 600 lariyə (təxminən 1008 manat) yüksələcək. Əsas məbləğ artırıldıqda bütün dövlət qulluqçularının maaşları mütənasib şəkildə yenilənir.

Yeni sistem üzrə 2026-cı ildən Baş nazirin illik maaşı 192 min lari (120 960 manat) olacaq ki, bu da əvvəlki dövrlə müqayisədə 16 800 lari (10 584 manat) artım deməkdir. Nazirlərin illik əməkhaqqı 163 200 lariyə (102 816 manat) yüksələcək və 14 280 lari (9 006 manat) artacaq. Deputatların illik maaşı isə 153 600 lariyə (96 768 manat) çatacaq və bu da 13 440 lari (8 467 manat) artım deməkdir.

Bütün yüksək vəzifəli şəxslərin illik əməkhaqqılarında artımlar tətbiq olunub və maaşlar 2026-cı ildən etibarən yeni əsas əməkhaqqına uyğun olaraq hesablanacaq.

2026-cı ildə Gürcüstanda yüksək vəzifəli şəxslərin aylıq əməkhaqqıları aşağıdakı kimi olacaq:

Prezident – 16 000 lari (10 080 manat);
Baş nazir – 16 000 lari (10 080 manat);
Nazir – 13 600 lari (8 568 manat);
Nazirin birinci müavini – 12 000 lari (7 560 manat);
Nazir müavini – 11 600 lari (7 308 manat);
Parlament sədri – 16 000 lari (10 080 manat);
Parlament sədrinin birinci müavini – 14 720 lari (9 273 manat);
Parlament sədrinin müavini – 14 400 lari (9 072 manat);
Komitə sədri – 13 760 lari (8 669 manat);
Komitə sədrinin birinci müavini – 13 280 lari (8 366 manat);
Büdcə komitəsi sədrinin müavini – 13 120 lari (8 256 manat);
Parlament fraksiyası sədri – 13 600 lari (8 568 manat);
Fraksiya sədrinin müavini – 12 960 lari (8 165 manat);
Millət vəkili – 12 800 lari (8 064 manat).

yeniavaz.com