Fuad Əsgərov: “Həkimə verilən dəyər cəmiyyətimizin inkişafına verilən dəyərdir”

Qan Donorları Assosiasiyasının sədri Fuad Əsgərov səhiyyə sahəsində çalışan insanların əməyinin layiqincə qiymətləndirilməsinin vacibliyini vurğulayıb.

Fuad Əsgərov bildirib ki, həkimlər və digər səhiyyə işçiləri cəmiyyətin sağlamlığının qorunmasında mühüm rol oynayırlar. Onun sözlərinə görə, səhiyyə sahəsində fəaliyyət göstərən insanların əməkhaqlarının artırılması onların əməyinə verilən dəyərin mühüm göstəricilərindən biridir.

“Həkimə verilən dəyər cəmiyyətimizin inkişafına verilən dəyər deməkdir. Səhiyyə sahəsində fəaliyyət göstərən insanların əməkhaqlarının artırılması və onların sosial rifahının yaxşılaşdırılması təqdirəlayiq addımdır. Bu qərar vətəndaş cəmiyyəti tərəfindən də böyük rəğbətlə qarşılanır”, – deyə Fuad Əsgərov qeyd edib.

Assosiasiya sədrinin sözlərinə görə, səhiyyə işçilərinin sosial müdafiəsinin gücləndirilməsi onların peşə fəaliyyətinə müsbət təsir göstərməklə yanaşı, səhiyyə xidmətlərinin keyfiyyətinin yüksəldilməsinə də xidmət edir.

Fuad Əsgərov əlavə edib ki, tibb işçilərinin əməyinin stimullaşdırılması, onların layiqli əmək şəraitinin və sosial təminatının daha da yaxşılaşdırılması səhiyyə sisteminin davamlı inkişafı baxımından xüsusi əhəmiyyət daşıyır.