DYP-dən sürücülərə təkərlə bağlı MÜRACİƏT

Payız-qış fəslində köhnə və aşınmış şinlərin istifadəsi ciddi təhlükə yaradır.

AJMEDİA.NEWS xəbər verir ki, bu barədə Baş Dövlət Yol Polisi İdarəsinin (BDYPİ) yaydığı müraciətdə qeyd olunub.

Bildirilib ki, uzun məsafəli səfərlər zamanı təkərlərdəki nasazlıqlar daha tez üzə çıxaraq, normativ tələblərin pozulmasına, hətta təkərlərin partlamasına gətirib çıxara bilər.

Qanunvericiliyə əsasən, avtomobil təkərlərinin protektorundakı naxışların hündürlüyü normaya uyğun olmadıqda, təkərin kord hissəsi çılpaqlıq olduqda, karkas təbəqələri ayrıldıqda, protektor və yan hissələrdə qopmalar və ya zədələr olduqda, yaxud eyni ox üzrə fərqli naxışlı təkərlərdən istifadə edilərkən həmin nəqliyyat vasitəsinin istismarına yol verilməməlidir, nasazlıqlar mütləq aradan qaldırılmalıdır.

Bəzən də zahirən “yeni” görünən təkərlər istifadə müddətinin bitməsi və ya düzgün saxlanmaması səbəbindən yararsız olur ki, onların istifadəsi ağır fəsadlara gətirib çıxara bilər.

Odur ki, Bakı Dövlət Yol Polisi İdarəsi sürücülərə və nəqliyyat vasitələrinin sahiblərinə müraciət edərək bildirir ki, istənilən hava şəraitində yaranan çətinlikləri təhlükəsiz şəkildə aradan qaldırmaq üçün sadalanan tövsiyələr daim diqqət mərkəzində saxlanılmalıdır.

Unutmayaq ki, mənzilə rahat və təhlükəsiz çatmaq üçün avtomobil təkərlərinin saz və mövsümə uyğun vəziyyətdə olması vacibdir.