Daha bir ölkə İran-İsrail müharibəsinə qoşulduğunu elan etdi

Yəmən ABŞ-nin İranın nüvə obyektlərinə hava zərbələrindən sonra rəsmi olaraq müharibəyə qoşulduğunu bəyan edib.
AJMEDİA xəbər verir ki, bu barədə Yəmən Silahlı Qüvvələri “X”dəki rəsmi hesabı vasitəsilə bəyanat yayıb.

“Yəmən rəsmi şəkildə müharibəyə qoşulur. Gəmilərinizi bizim ərazi sularımızdan uzaq saxlayın”, - bəyanatda deyilir.

Bu bəyanat ABŞ-nin İranın nüvə obyektlərinə endirdiyi zərbələrdən sonra verilib.

Yəmənin münaqişəyə qoşulması ilə Qırmızı dənizdə yeni cəbhə açılır. Belə ki, husilər əvvəllər də ABŞ hərbi gəmilərini və ticarət gəmilərini hücumla hədələmişdilər. Qırmızı dəniz və xüsusilə Bab əl-Məndəb boğazı qlobal neft ticarətində strateji əhəmiyyətə malik marşrutdur.

Ekspertlər xəbərdarlıq edirlər ki, İranın müttəfiqləri – Yəmən (husilər), İraq şiə milisləri və “Hizbullah” arasında koordinasiya genişmiqyaslı regional müharibəyə səbəb ola bilər.

Qeyd edək ki, bu gecə ABŞ silahlı qüvvələri İranın əsas nüvə infrastrukturlarına koordinasiyalı hücum həyata keçirib. Əməliyyat çərçivəsində Fordo şəhərində yerin dərinliklərində yerləşən nüvə obyektinə altı ədəd GBU-57 tipli bunker əleyhinə bomba atılıb. Bu bombalar yalnız B-2 Spirit bombardmançı təyyarələri ilə daşına bilir və hər birinin çəkisi 13 tondan artıqdır. Hər B-2 təyyarəsi iki belə bombanı daşımaq gücünə malikdir.

Bundan başqa, İranın İsfahan və Natanz şəhərlərində yerləşən digər iki nüvə obyektinə qarşı həyata keçirilən hücumlarda ABŞ Hərbi Dəniz Qüvvələrinin Ohayo sinifli sualtı qayıqlarından buraxılmış 30-a yaxın “Tomahawk” qanadlı raketindən istifadə olunub.//yeniavaz.com