"Biz barışıq istəmirik" - Abbas Əraqçı

"Tehran mövcud münaqişədə barışığa hazır deyil, lakin müharibənin gələcəkdə bir daha təkrarlanmayacağı şəkildə bitməli olduğu qənaətindədir".

AJMEDIA.NEWS-un "Azad İran" "Telegram" kanalına istinadən xəbərinə görə, bu barədə İranın xarici işlər naziri Abbas Əraqçı jurnalistlər üçün keçirilən brifinqdə bildirib.

Nazirin sözlərinə görə, İran mövcud vəziyyətdə "qürurlu müqavimət" nümayiş etdirir və bu xətti tərəddüdsüz davam etdirmək niyyətindədir.

Abbas Əraqçı qeyd edib ki, Tehran münaqişə ilə bağlı heç bir tərəfə hər hansı mesaj göndərməyib və barışıq əldə edilməsinə cəhd göstərmir. O əlavə edib ki, bu mövqeyi, həmçinin ABŞ telekanallarından birinə verdiyi müsahibədə də səsləndirib.

Xarici işlər nazirinin sözlərinə görə, əsas məqsəd ondan ibarətdir ki, mövcud qarşıdurma elə şəkildə bitsin ki, gələcəkdə bir daha oxşar müharibə təkrarlanmasın.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.