ABŞ-ın Venesuelaya hücumu belə planlaşdırılıb

ABŞ-ın Venesuelaya qarşı həyata keçirdiyi hərbi əməliyyatlarla bağlı yeni detallar açıqlanıb.

Məlumata görə, Ağ Ev ABŞ Hərbi Hava Qüvvələrinə məxsus təyyarələr Venesuela hava məkanını tam tərk etdikdən sonra rəsmi bəyanat yaymağı planlaşdırır. Bu barədə "The Wall Street Journal" yazıb.

Hücumun ilkin olaraq 25 dekabr tarixinə planlaşdırıldığı, lakin sonradan təxirə salındığı bildirilir. CBS News bu gecikməni əlverişsiz hava şəraiti ilə əlaqələndirib.

Eyni zamanda, CNN mənbəyə istinadla xəbər verir ki, ABŞ Senatının Silahlı Qüvvələr Komitəsi Venesuela ərazisində aparılan hərbi əməliyyatlarla bağlı əvvəlcədən məlumatlandırılmayıb.

Kolumbiya prezidenti açıqlayıb ki, Venesuelada ən azı 11 obyekt hücuma məruz qalıb. Onun paylaşdığı siyahıya parlament binası, La-Karlota hava limanı, Katia-la-Mar dağ hərbi qarnizonu, Fuerte-Tiuna hərbi bazası, El-Atillo hava limanı, Barquisimeto şəhərində yerləşən F-16 №3 aviabazası, Çarallavedəki Karakasın özəl hava limanı və İgerote hərbi helikopter bazası daxildir. Hücumların Karakasın tarixi mərkəzində də qeydə alındığı bildirilir.

"RIA Novosti" mənbəyə istinadla xəbər verir ki, ABŞ qüvvələri Karakasda qaz nəqli infrastrukturu obyektlərinə də zərbələr endirib.

Bundan əlavə, ABŞ aviasiya qurumları Venesuela hava məkanında kommersiya uçuşlarını müvəqqəti olaraq qadağan edib. Bu barədə Fox News məlumat yayıb.

"The New York Times" isə yazır ki, Karakasda partlayışlar artıq səngisə də, ABŞ-a məxsus hərbi təyyarələr hələ də havadadır.

Hazırda vəziyyətlə bağlı rəsmi təsdiqlər və əlavə açıqlamalar gözlənilir.//musavat.com