156 ada qalmaqalı böyüyür – Afina Ankaranı hədələdi

Yunanıstanın Milli Partiyasının Avropa Parlamentindəki qrup sədri Elisa Vosberq Türkiyə ilə bağlı sərt bəyanatla çıxış edib.

AJMEDİA.NEWS xəbər verir ki, o, Türkiyənin 156 Yunan adasında Türkiyə bayrağı qaldıracağı ilə bağlı fikirlərə münasibət bildirərək bunu tam absurd adlandırıb.

“Əgər bu baş versə, Allah eləməsin, buna cavab veriləcək və həmin cavab çox qəti və çox gur olacaq”, - deyə Vosberq bildirib.

Yunan siyasətçi Türkiyənin siyasətini yenidən ərazi iddiaları siyasəti kimi qiymətləndirərək bunun yalnız Prezident Rəcəb Tayyib Ərdoğanla bağlı olmadığını bildirib.

“Türkiyənin yenidən ərazi iddiaları siyasəti təkcə Ərdoğanla bağlı deyil. Hakimiyyətdə kimin olmasından asılı olmayaraq, bu, Türkiyənin siyasətidir”, - deyə o vurğulayıb.

Qeyd edək ki, Türkiyə-Yunanıstan münasibətlərində Egey dənizi, adaların statusu və dəniz səlahiyyət zonaları ilə bağlı mübahisələr uzun illərdir davam edir. Bu fonda Yunanıstanın bəzi siyasi dairələrində Türkiyənin bölgədə artan nüfuzu və hərbi-siyasi imkanları ilə bağlı narahatlıq tez-tez gündəmə gətirilir.