Zelenski Abramoviçin ala bilmədiyi pullarını necə xərcləmək istəyir?

Ukrayna Prezidenti Volodimir Zelenski Böyük Britaniyanın Baş naziri Kir Starmer ilə rusiyalı oliqarx Roman Abramoviçin "Çelsi" futbol klubunun satışından əldə etdiyi məbləğin hansı məqsədlər üçün xərclənəcəyini müzakirə edib.

AJMEDIA.NEWS-un xəbərinə görə, Ukrayna lideri bu barədə "The Guardian" nəşrinə müsahibəsində danışıb.

Volodimir Zelenski qeyd edib ki, Starmer ilə klubun satışından əldə edilən və Britaniya hökumətinin Ukraynadakı humanitar ehtiyaclar üçün istifadə etmək niyyətində olduğu 2.4 milyard funt-sterlinqi müzakirə ediblər.

Onun sözlərinə görə, ədalətli olardı ki, bu pullar humanitar proqramlara deyil, Ukraynanın hava hücumundan müdafiəsinin gücləndirilməsinə və Rusiya raketlərini ələ keçirmək üçün sistemlərin alınmasına yönəldilsin.

"Baş nazir (Kir Starmer - red.) mənə dedi ki, o, hər cür səy göstərir və mən bilirəm ki, bizim diplomatik komandalarımız bunu müzakirə edirlər. Bu, çətin məqamdır", - deyə Zelenski qeyd edib.

Onun sözlərinə görə, bu vəsaitlər Ukraynaya ABŞ-dən əlavə raket hücumundan müdafiə sistemlərini almağa kömək edə bilər.

Volodimir Zelenski, həmçinin zarafatla bildirib ki, Abramoviçlə görüş zamanı ona pullar barədə xatırladıb.

"Bizə sizin pullarınız lazımdır", - deyə o, Abramoviçə bildirib.