Yaxın Şərqdə fikir ayrılığı dərinləşir: Netanyahu “qırmızı xətt” çəkdi, Berlin iki dövlətli həlli zəruri sayır

Yaxın Şərqdə sülhün gələcəyi ilə bağlı beynəlxalq müzakirələr kəskin mərhələyə qədəm qoyub. İsrail Baş naziri Benyamin Netanyahu son çıxışında sərt mövqeyini yenidən ortaya qoyaraq Fələstin dövlətinin yaradılmasına qəti şəkildə qarşı çıxdığını bildirib.

Musavat.com-un məlumatına görə, Netanyahu açıqlamasında deyib ki, “Fələstin dövlətinin məqsədi yeganə yəhudi dövlətini məhv etməkdir”. O, Qəzzada de-fakto formalaşmış idarəetmənin illər boyu İsrailə qarşı hücum meydanına çevrildiyini vurğulayaraq bildirib:

“İsrail öz qapısında onu məhv etməyə çalışan bir dövlətin yaradılmasına icazə verməyəcək”.

Bunun fonunda Almaniya kansleri Fridrix Merts tamamilə fərqli mövqe sərgiləyib. O, bölgədə uzunmüddətli sabitliyin iki dövlətli həll olmadan mümkün olmayacağını xatırladıb:

“Biz İsrail dövləti ilə yanaşı Fələstin dövlətinin də tanındığı yeni bir Yaxın Şərq istəyirik. Müzakirələr aparılmalı və prosesin sonunda Fələstin dövləti yaradılmalıdır”.

Kansler eyni zamanda Berlinin İsrailə dəstəyinin dəyişməz olduğunu vurğulayıb:

“Almaniya İsrailin mövcudluğunu və təhlükəsizliyini müdafiə etməlidir. Bu, münasibətlərimizin davamlı təməlidir və belə də qalacaq”.