Yakov Kedmi İsrail Dövlətinin rəsmi nümayəndəsi deyil

Yakov Kedmi (əvvəlki soyadı Kazakov) sovet əsilli keçmiş israilli diplomat və xüsusi xidmət orqanlarının sabiq əməkdaşıdır. O, 1990-cı illərdə İsrailin "Nativ" təşkilatına – keçmiş SSRİ ölkələrindən yəhudilərin İsrailə köçürülməsi ilə məşğul olan quruma rəhbərlik etmişdir. Bu vəzifə onun dövlət strukturlarında mühüm rol oynamasına səbəb olsa da, hazırda o, heç bir rəsmi dövlət vəzifəsi daşımır.

Son illərdə Yakov Kedmi daha çox Rusiya mediasında ekspert və siyasi şərhçi kimi çıxışları ilə tanınır. Xüsusilə Rusiya televiziya kanallarında geosiyasi məsələlərə dair sərt və zaman-zaman qalmaqallı fikirləri ilə seçilir. Onun bəyanatları bəzən ictimaiyyətdə və media qurumlarında çaşqınlıq yaradır və bu səbəbdən bəziləri onu İsrailin rəsmi mövqeyini ifadə edən şəxs kimi təqdim etməyə meyllidirlər.

Lakin bu, tamamilə yanlışdır. Yakov Kedmi İsrail Dövlətini rəsmi olaraq təmsil etmir. O, artıq uzun illərdir ki, istər diplomatik, istərsə də dövlət xidmətində aktiv deyil. Hazırda o, müstəqil analitik və ekspert kimi fəaliyyət göstərir və səsləndirdiyi fikirlər yalnız onun şəxsi mövqeyidir. İsrail Xarici İşlər Nazirliyi dəfələrlə bəyan etmişdir ki, Kedminin açıqlamaları dövlətin rəsmi siyasətini əks etdirmir.

Buna görə də, ictimaiyyət və media nümayəndələri onun çıxışlarını qiymətləndirərkən bu məqamı nəzərə almalı, onun fərdi statusunu və İsrail dövləti ilə rəsmi əlaqəsinin olmadığını unutmamalıdırlar.

https://x.com/israelinaz/status/1952407395201646646?s=46

İqor Roytapel

İsraildəki AJM Bürosunun rəhbəri