Trampdan SƏRT QƏRAR: İdxalı və satışı qadağan edildi

ABŞ-də xarici Pilotsuz Uçuş Aparatlarının (PUA) idxalı və satışı qadağan edilib.

AJMEDİA.NEWS xəbər verir ki, Federal Rabitə Komissiyası (FCC) Tramp administrasiyasının milli təhlükəsizlik səbəblərini əsas gətirərək bu qərarı açıqlayıb.

Komissiyanın məlumatına görə, digər ölkələrdə istehsal olunan dronlar və komponentləri ABŞ vətəndaşlarının təhlükəsizliyi üçün ciddi risk yaradır. Sənəddə qeyd olunur ki, bu cihazlar Komissiyadan icazə almadan ABŞ-da istifadə və satış üçün idxal edilə bilməyəcək.

Qadağa milli təhlükəsizlik təhdidi yaradan rabitə texnologiyalarının siyahısına xarici dronları da əlavə edir. Müdafiə və Daxili Təhlükəsizlik Nazirliyi tərəfindən təsdiqlənən istisnalar isə tətbiq olunacaq. FCC 2026-cı il FİFA Dünya Kuboku və 2028-ci il Yay Olimpiya Oyunları da daxil olmaqla, qarşıdakı böyük tədbirlər üçün əlavə təhlükəsizlik tədbirlərinin vacib olduğunu vurğulayıb.

Qadağa ABŞ-da dron istehsalını da stimullaşdırmaq məqsədi daşıyır və əvvəllər alınmış cihazlara təsir etməyəcək.

"The New York Times" xəbər verir ki, qərar xüsusilə Çin şirkəti DJI-nin dronlarına təsir edəcək. ABŞ-da qeydiyyatdan keçmiş operatorlar əsasən bu cihazlardan tarlaları gübrələmək, tikinti sahələrini izləmək və infrastruktur yoxlamaq üçün istifadə edirlər. Qadağa təcili yardım xidmətlərinin istifadəsinə isə şamil edilməyib, polis və xilasetmə qrupları dronlardan cinayətkarları və itkin düşən şəxsləri axtarmaq üçün istifadə etməyə davam edə biləcək.