Tbilisi sakinləri ərəb şirkətinin layihəsinə etiraz edirlər – Bənzər layihə Bakıda da icra olunacaq

Yüzlərlə insan Gürcüstan paytaxtının Rustaveli prospektində Birləşmiş Ərəb Əmirliklərinin (BƏƏ) “Eagle Hills” şirkətinin ölkədə həyata keçirməyi planlaşdırdığı iri tikinti layihələrinə etiraz edir.
AJMEDIA TASS-a istinadən xəbər verir ki, nümayiş iştirakçıları prospekti bağlayaraq nəqliyyatın hərəkətinə mane olublar. Polis əməkdaşları “Eagle Hills”in Tbilisidəki ofisini mühasirəyə alaraq ərazidə asayişi təmin etməyə çalışırlar. Aksiyanı müxalif “Mühafizəkarlar Hərəkatı” partiyası təşkil edib.

Etirazlara səbəb oktyabr ayında imzalanmış 6,6 milyard dollarlıq investisiya sazişidir. Saziş Gürcüstanın İqtisadiyyat və Davamlı İnkişaf naziri Mariam Kvrivişvili ilə “Eagle Hills” şirkətinin təsisçisi Mohamed Alabbar arasında bağlanıb. Müqaviləyə əsasən, Tbilisidə və Qara dəniz sahilindəki Qonio kurortunda genişmiqyaslı tikinti layihələrini həyata keçirəcək birgə müəssisə yaradılacaq. Gürcüstan tərəfi həmin müəssisədə 33% paya malik olacaq.

Planlara görə, Tbilisidə 600 hektar ərazidə ümumi sahəsi 1 milyon kvadratmetrdən çox olan yaşayış və kommersiya kompleksləri, o cümlədən otellər inşa ediləcək. Qonioda isə 250 hektarlıq ərazidə yeni premium səviyyəli kurort yaradılması nəzərdə tutulur.

Hazırda aksiyanın nə qədər davam edəcəyi və hökumətin nümayişçilərin tələblərinə hansı cavabı verəcəyi məlum deyil.

Məlumat üçün bildirək ki, bu ilin sentyabr ayında Bakıda keçirilən 1-ci Azərbaycan Beynəlxalq İnvestisiya Forumunda Baş nazirin müavini Samir Şərifov və Birləşmiş Ərəb Əmirliklərinin investisiya naziri Muhəmməd Həsən əs-Suveydinin iştirakı ilə Azərbaycan İqtisadiyyat Nazirliyi ilə BƏƏ-nin “Modon Holding”i arasında “Şəhər daxilində şəhər” (“City within a City”) konsepsiyasının inkişafına dair əməkdaşlıq müqaviləsi imzalanıb.

İqtisadiyyat naziri Mikayıl Cabbarov və “Modon Holding”in sədri Cəssəm Muhəmməd Bu Ataba əz-Zəəbi tərəfindən imzalanan sənədə əsasən, Böyükşor gölü ətrafında 5 milyard dollarlıq investisiya ilə sağlamlıq, ticarət, təhsil və mehmanxana obyektlərini əhatə edən müasir sahilyanı zona yaradılacaq.//yeniavaz.com