Tarixi rüsvayçılıq: Putinin ordusu cəbhədə gündə 15 metr irəliləyib

Ukraynada döyüşən Rusiya ordusunun hücum tempi müasir müharibə tarixində son yüz ilin ən aşağı göstəricisi kimi qeydə alınıb.

AJMEDİA.NEWS xəbər verir ki, bu barədə Vaşinqtonda yerləşən Strateji və Beynəlxalq Araşdırmalar Mərkəzinin (CSIS) illik hesabatında qeyd olunur.

Ekspertlərin hesablamalarına görə, Rusiya ordusu son illərdə ağır itkilər bahasına minimal ərazilər ələ keçirə bilib. Orta hesabla ayda 35 min nəfər itki verən Rusiya Silahlı Qüvvələri ötən il Ukrayna ərazisinin yalnız 0,8 faizini (4831 kvadrat kilometr), 2024-cü ildə isə 0,6 faizini (3604 kvadrat kilometr) nəzarətə götürə bilib.

CSIS-in hesabatında vurğulanır ki, bəzi istiqamətlərdə Rusiya ordusunun irəliləyişi hətta Birinci Dünya müharibəsi dövrünün məşhur səngər döyüşlərindən də zəif olub.

Belə ki, 2024-cü ilin fevralında başlayan Çasov Yar istiqamətində hücumun sürəti gündə cəmi 15 metr təşkil edib. İki ilə yaxın müddətdə Rusiya qoşunları cəmi 10 kilometr irəliləyə bilib və şəhəri tam nəzarətə götürə bilməyib.

2024-cü ilin noyabrında başlayan Kupyansk istiqamətində əməliyyatlarda irəliləyiş gündə 23 metr olub.

2024-cü ilin fevralından sonra Avdeyevka uğrunda qanlı döyüşlərdən sonra başlanan Pokrovsk əməliyyatında isə hücum tempi gündə təxminən 70 metrə çatıb. İki il ərzində 50 kilometr irəliləyən Rusiya qüvvələri hazırda şəhərin böyük hissəsinə nəzarət edir.

Ekspertlər bu göstəriciləri tarixi müharibələrlə müqayisə ediblər. Məsələn, Birinci Dünya müharibəsinin ən qanlı döyüşlərindən biri sayılan Sommada Fransa ordusu gündə 80 metr irəliləyirdi.