Rusiyada azərbaycanlılara qarşı təxribat davam edir - Bir ailə deportasiya edildi

Azərbaycanlı ailə oğlunun davasına görə Sankt-Peterburqdan deportasiya edilib.

AJMEDİA.NEWS xarici KİV-ə istinadən xəbər verir ki, şəhərin Nevski rayonunda yeniyetmələr arasında sosial şəbəkədə başlayan mübahisə ağır nəticələrə səbəb olub.

Belə ki, 16 yaşlı yeniyetmə 13 yaşlı azərbaycanlı ilə yazışmada dava edib, bundan sonra onlar şəxsən görüşüb söhbət etməyə razılaşıblar.

İddiaya görə, 13 yaşlı azərbaycanlı dostları ilə 16 yaşlı yeniyetməni döyüb.

Polis əməliyyat-istintaq tədbirləri zamanı valideynləri, qardaşı, bacısı və münaqişə iştirakçısının özü də daxil olmaqla, bütün ailənin deportasiya edilməsi barədə qərar qəbul edilib.

Qeyd edək ki, bir neçə gün əvvəl Yekaterinburqda OMON dəstələri azərbaycanlıların yaşadığı ünvanlara basqın ediblər. Hadisə nəticəsində iki nəfər döyülərək öldürülüb, bir neçə nəfər saxlanılıb.