Rusiya PUA-sı Rumıniyada yaşayış binasına belə çırpıldı - ANBAAN VİDEO

Rumıniyanın şərqində yerləşən Qalats şəhərində yaşayış binasına çırpılan Rusiya pilotsuz uçuş aparatı (PUA) partlayışa və yanğına səbəb olub.

AJMEDİA.NEWS xəbər verir ki, bu barədə “Mediafax” agentliyi məlumat yayıb.

Məlumata görə, dronun binaya çırpılması nəticəsində güclü partlayış dalğası yaranıb və dərhal mənzillərdən birində yanğın başlayıb. Hadisə nəticəsində iki nəfər müxtəlif dərəcəli bədən xəsarətləri alıb. Hadisə yerinə gələn yanğınsöndürənlərin operativ müdaxiləsi sayəsində alovun digər mənzillərə keçməsinin qarşısı alınıb və yanğın tamamilə söndürülüb.

Qeyd olunub ki, fövqəladə vəziyyətlə əlaqədar olaraq binadan təxminən 70 sakin təcili şəkildə təxliyə edilib və ərazi nəzarətə götürülüb.

Hadisədən sonra Rumıniya Prezidenti Nikuşor Dan Rusiyaya qarşı sərt bəyanatlarla çıxış edib. Dövlət başçısı Rusiya-Ukrayna münaqişəsinin Rumıniya vətəndaşlarının həyatına və təhlükəsizliyinə təsir etməsi ilə heç bir halda barışmayacaqlarını bəyan edib. O, Xarici İşlər Nazirliyinə təcili olaraq Rusiya ilə münasibətlərə dair xüsusi tədbirlər planı hazırlamaq tapşırığı verdiyini vurğulayıb.