Rusiya Ermənistandan bu məhsulların da idxalını dayandırır

Ermənistan iyunun 2-dən etibarən Rusiya Federasiyasına ixrac üçün nəzərdə tutulan diri balıq və balıq məhsullarının sertifikatlaşdırılmasını dayandırmalıdır.

AJMEDIA.NEWS xəbər verir ki, bu barədə Rusiyanın Baytarlıq və Fitosanitar Nəzarət üzrə Federal Xidməti ("Rosselxoznadzor") məlumat yayıb.

Rusiyanın dövlət xidmətinin mütəxəssisləri tərəfindən Ermənistandakı balıq təsərrüfatlarında keçirilmiş monitorinqin yekunlarına dair məlumatda bildirilir:

"Yoxlamanın nəticələrinə görə, 2 iyun 2026-cı il tarixindən etibarən yaranmış vəziyyət həll olunana qədər Ermənistan tərəfi, yoxlamadan keçmiş iki şirkət istisna olmaqla, bütün Ermənistan şirkətlərindən rusiyalı alıcılar üçün diri balıq və balıq məhsullarının baytarlıq sertifikatlaşdırılmasını dayandırmalıdır".

Daha əvvəl "Rosselxoznadzor" Ermənistanın kənd təsərrüfatı məhsullarının Avrasiya İqtisadi İttifaqının və Rusiyanın fitosanitar tələblərinə cavab vermədiyini bildirmişdi.

Ötən həftədən bəri Rusiya Ermənistandan meyvə-tərəvəz və gül idxalını da müvəqqəti olaraq məhdudlaşdırıb.

Mayın 29-da isə "Rospotrebnadzor" Rusiyada Ermənistanın "Cermuk" mineral suyunun satışının dayandırılması barədə açıqlama vermişdi.