“Razılaşmaya çox yaxınıq, amma Ukrayna da ‘hə’ deməlidir” - Tramp

ABŞ prezidenti Donald Tramp Alyaska sammitindən sonra verdiyi açıqlamada Rusiya ilə danışıqların müsbət ruhda keçdiyini və bir sıra məsələlərdə razılıq əldə olunduğunu bildirib.

Trampın sözlərinə görə, tərəflər “mühüm məqamların əksəriyyəti üzrə” anlaşma əldə ediblər:

“Düşünürəm ki, razılaşmaya çox yaxınıq. Bir çox məsələlərdə ortaq nöqtələr tapdıq. Görüş çox isti və konstruktiv keçdi. Putin güclü, sərt adamdır, amma eyni zamanda dialoqa açıq idi.”

Bununla belə, ABŞ lideri yekun razılaşmanın Ukraynanın mövqeyindən asılı olduğunu vurğulayıb:
“Ukrayna da bu şərtlərlə razılaşmalıdır. Ola bilər ki, ‘yox’ desinlər. Çünki Bayden onlara pulları konfet kimi paylayıb.”

Jurnalistin “Bu proses torpaq mübadiləsi və NATO-dan kənar təhlükəsizlik zəmanətləri ilə nəticələnə bilərmi?” sualına cavabında isə Tramp deyib:
“Bu, müzakirə etdiyimiz əsas məsələlərdən biridir. Çox güman, həqiqətən də nəticə belə olacaq.”

ABŞ prezidentinin bu açıqlamaları beynəlxalq mediada geniş rezonans doğurub. Analitiklərin bir hissəsi bunu Trampın “sülh sazişinə yaxınlıq mesajı”, digər hissəsi isə “Ukraynanın ərazi bütövlüyü ilə bağlı güzəştlərə təzyiq” kimi qiymətləndirir.//musavat.com