Putinin karikaturasını çəkən rəssam Polşada güllələnib

Rusiyalı karikaturaçı Semyon Skrepetski Polşada güllələnib və polis bir şübhəlinin həbs olunduğunu elan edib.

AJMEDIA.NEWS xarici mediaya istinadla xəbər verir ki, Polşanın "Podlaski" nəşrinin məlumatına görə, hücum Biala Podlaskadakı dayanacaqda baş verib. Hücum edənlər kişini maşınların yaxınlığında gözləyiblər, sonra ona bir neçə dəfə yaxın məsafədən sərrast atəş açıblar və qaçıblar. O, aldığı yaralardan hadisə yerində ölüb.

wPolsce24 televiziya kanalı bildirir ki, hadisədən sonra polis şəhərin küçələrini və çıxışlarını bağlayıb və qurbanın uşaqlarının ola biləcəyi məktəb və uşaq bağçalarında təhlükəsizliyi artırıb.

Televiziya kanalının məlumatına görə, iki hücumçu ola bilər. Şübhəlilərdən biri Biala Podlaskadakı Belarus konsulluğunun yaxınlığında saxlanılıb. Qeyri-rəsmi məlumatlara görə, saxlanılan şəxs Belarus vətəndaşıdır.

Semyon Skrepetski Rusiya rəhbərliyini lağa qoyan sərt siyasi satirası ilə tanınırdı. O, həmçinin Ukrayna hakimiyyətini tənqid etmiş və Myrotvorets məlumat bazasında yer almışdı.

Skrepetskinin (əsl adı Robert Kuzovkov) "rus faşist təbliğatı" hekayələrini yaydığı, "Ukraynanın suverenliyinə və ərazi bütövlüyünə" qəsd etdiyi və "Ukrayna Silahlı Qüvvələrini nüfuzdan salmağa yönəlmiş qəsdən hərəkətlər" həyata keçirdiyi barədə də informasiyalar var.