"Putin öləcək, zülm bitəcək" - Zelenskinin Milad arzusu

Ukrayna Prezidenti Volodimir Zelenski Milad bayramı münasibətilə etdiyi müraciətdə Rusiya Prezidenti Vladimir Putin barədə səsləndirdiyi fikirlərlə diqqət çəkib.

AJMEDİA.NEWS xəbər verir ki, “The Independent” nəşrinin yazdığına görə, Zelenskinin açıqlamaları Putinə ölüm arzuladığı təəssüratı yaradıb.

Milad ərəfəsində X sosial şəbəkəsində paylaşdığı video-müraciətdə Zelenski bildirib ki, Rusiyanın Ukraynaya gətirdiyi bütün iztirablara baxmayaraq, ölkəni ən vacib dəyərlərdən məhrum etmək mümkün olmayıb. O vurğulayıb ki, Ukrayna xalqının ürəyi, bir-birinə olan inamı və birliyi işğal edilə və ya bombalana bilməz.

Zelenski çıxışında dolayısı ilə Rusiya liderinə işarə edərək deyib: “Bu gün hamımızın bir arzusu var. Və hər birimiz ürəyimizdə ‘qoy o məhv olsun’ deyə düşünə bilərik. Lakin Tanrıya üz tutarkən biz daha böyük bir dilək istəyirik – Ukrayna üçün sülh. Biz bunun üçün mübarizə aparırıq, dua edirik və buna layiqik”.

The Independent qeyd edir ki, Zelenski eyni zamanda Rusiyanın Milad ərəfəsində də hücumlarını davam etdirdiyini bildirib. Onun sözlərinə görə, Rusiya ordusu kütləvi artilleriya atəşləri, “Shahed” pilotsuz uçuş aparatları, ballistik raketlər və “Kinzhal” zərbələri daxil olmaqla bütün vasitələrdən istifadə edib.

Nəşr əlavə edir ki, Ukrayna lideri bir müddət əvvəl ölkənin şərqində mümkün sülh razılaşması çərçivəsində demilitarizasiya olunmuş zona yaradılmasına açıq olduğunu da bəyan edib.