Peru liderinin yəhudilərlə bağlı açıqlaması Almaniya və İsrailin etirazına səbəb oldu

Almaniya və İsrailin Perudakı səfirlikləri bu ölkənin rəhbəri Xose Mariya Balkazardan İkinci Dünya müharibəsinin başlamasında yəhudilərin iştirakı ilə əlaqədar verdiyi bəyanatları geri götürməsini tələb ediblər.

Oxu.Az xəbər verir ki, bu barədə "RİA Novosti" məlumat yayıb.

Bu günlərdə Peru lideri Lima Ticarət Palatasının təşkil etdiyi tədbirdə çıxış edərkən keçmiş hadisələri xatırladıb, bir zamanlar yəhudilərin Almaniyanın iqtisadi həyatında ciddi mövqeyə sahib olduğunu və dövlətin müharibəyə qatılmasında onların müəyyən qədər payı ola biləcəyini iddia edib.

Bununla bağlı Almaniya və İsrail diplomatik nümayəndəliklərinin yaydığı bəyanatda vurğulanır:

"Biz ümid edirik ki, Balkazar söylədiyi fikirlərdən imtina edəcək".

Səfirliklər yəhudilərin Almaniyada ticarətə nəzarət etməsi və ölkəni hərbi toqquşmaya sürükləməsi ilə bağlı fikirləri cəfəngiyat və tarixi baxımdan köksüz adlandırıblar. Diplomatik rəsmilər bildiriblər ki, bu cür yanaşmalar nasizm rejimindən zərər görən yəhudilərin xatirəsinə qarşı hörmətsizlikdir.

Sənəddə irqçi və antisemit ideologiyaların altı milyon yəhudinin ölümü ilə nəticələndiyi xüsusi qeyd olunur. Səfirliklər bildiriblər ki, məhz bu səbəbdən Holokost faktı heç bir vəchlə dəyişdirilməməli və onun miqyası kiçildilməməlidir.