Paşinyanın bu ifadəsi Ermənistanı qarışdırdı

Ermənistanın baş naziri Nikol Paşinyanın son çıxışında işlətdiyi “səma ordusu” ifadəsi ölkə daxilində yeni müzakirələrə səbəb olub.

AJMEDİA.NEWS xəbər verir ki, analitik, revanşist mövqeyi ilə tanınan Akop Badalyanın fikrincə, bu termin ilk baxışdan həlak olmuş hərbçilərin xatirəsinə yönəlmiş emosional ifadə kimi təqdim olunsa da, əslində siyasi məna daşıyır.

Badalyan bildirir ki, Paşinyan bu anlayış vasitəsilə Ermənistan silahlı qüvvələrini şərti olaraq iki hissəyə ayırır. Onun fikrincə, “səma ordusu” adlandırılan qüvvə əsasən Qarabağ istiqamətində təhlükəsizlik sisteminin qorunmasında iştirak etmiş hərbçiləri əhatə edir. Bu isə “real Ermənistan” və “tarixi Ermənistan” konsepsiyaları arasında siyasi bölgü yaratmaq məqsədi daşıyır.

Analitikin qənaətinə görə, bu termin yalnız emosional prizma ilə qəbul edildikdə sadəcə həlak olan əsgərlərin ümumi adı kimi görünə bilər. Lakin siyasi baxımdan bu ifadə Ermənistan ordusunun keçmiş fəaliyyətinə münasibətin dəyişdirilməsi cəhdi kimi qiymətləndirilir.

Badalyan xatırladır ki, Paşinyan 18 avqust 2025-ci il tarixli müraciətində də müharibədə həlak olanların xatirəsinin anılma formasının dəyişdiriləcəyini açıq şəkildə bəyan edib. Həmin çıxışda “sülhün himayəsi” konsepsiyası çərçivəsində hətta anım mərasimlərinin məzmununun yenidən formalaşdırılmasının nəzərdə tutulduğu vurğulanıb.

Ekspertin fikrincə, “səma ordusu” termini də məhz bu siyasi xəttin davamı kimi ortaya çıxıb və hakimiyyətin keçmiş hərbi strategiyaya münasibətini yenidən qurmaq cəhdidir.