Paşinyan Rusiyanı hədəf aldı: "İnsanları bizə qarşı qaldırırsınız!"

Ermənistanın baş naziri Nikol Paşinyan Rusiyanın Ermənistan istehsalı olan kənd təsərrüfatı məhsullarının idxalına qoyduğu məhdudiyyətləri kəskin tənqid edib.

AJMEDIA.NEWS xəbər verir ki, hökumət başçısı bu növ addımların vətəndaşların Avrasiya İqtisadi İttifaqına (Aİİ) olan münasibətinə mənfi təsir göstərdiyini bildirib.

Ermənistan hökumət rəhbərinin sözlərinə görə, ayrı-ayrı şirkətlərdə fitosanitar xarakterli problemlər yarana bilər, lakin ümumilikdə ölkədə kənd təsərrüfatı məhsullarının keyfiyyətinə nəzarət sistemi effektiv işləyir və təkmilləşdirilməyə davam edir.

"Hesab edirəm ki, bunlar yanlış addımlardır, çünki insanları Aİİ-yə qarşı qaldırır. Aİİ-nin yüksək rütbəli rəsmi nümayəndəsi kimi bu, mənim üçün bir problemdir. Lakin biz bütün bu məsələləri həll edəcəyik", - deyə Paşinyan vurğulayıb.

O, həmçinin yaranmış fikir ayrılıqlarının aradan qaldırılacağına əminliyini ifadə edib və qeyd edib ki, Ermənistan öz məhsullarının keyfiyyətinin yüksəldilməsi, eləcə də nəzarət mexanizmlərinin inkişafı istiqamətində işləri davam etdirir.