Paşinyan Putinə Moskvada söz atdı: “Bizdə demokratiya var...”

Moskvada keçirilən görüş zamanı Ermənistanın Baş naziri Nikol Paşinyan ilə Rusiya Prezidenti Vladimir Putin arasında maraqlı dialoq diqqət çəkib.

AJMEDİA.NEWS xəbər verir ki, görüş zamanı Paşinyan Rusiyada sosial şəbəkələrin məhdudlaşdırılması mövzusuna toxunaraq istehzalı şəkildə bildirib ki, Ermənistanda tamamilə azad sosial media, azad seçkilər və demokratiya mövcuddur.

Onun bu sözləri zalda gülüşlə qarşılanıb və bir çoxları bu ifadəni Putinə yönəlmiş incə siyasi mesaj kimi qiymətləndirib.

Paşinyanın bu açıqlaması sosial şəbəkələrdə də geniş müzakirələrə səbəb olub. İstifadəçilərin bir qismi Ermənistan baş nazirinin açıq mesaj verdiyini, digərləri isə bunun sadəcə zarafat olduğunu yazıb. Siyasi şərhçilər isə bildirir ki, Paşinyan son illər Qərblə münasibətləri gücləndirməyə çalışdığı üçün bu cür açıqlamalar təsadüfi deyil və Moskva ilə münasibətlərdə müəyyən gərginliyin göstəricisi sayıla bilər.

Qeyd edək ki, Moskva görüşündə əsas müzakirə mövzuları regionda təhlükəsizlik, Ermənistan–Rusiya münasibətləri və iqtisadi əməkdaşlıq məsələləri olub. Lakin görüşdən ən çox yayılan məhz Paşinyanın demokratiya ilə bağlı istehzalı çıxışı olub.