Ölkəyə gətirilən avtomobillərin sayı və qiyməti açıqlandı

Bu ilin ilk yarısında Azərbaycana 960,7 milyon dollar dəyərində 51 min 727 ədəd müxtəlif təyinatlı avtomobil idxal olunub.
AJMEDİA açıqlanan rəsmi məlumatlara istinadən xəbər verir ki, ötən ilin eyni dövrü ilə müqayisədə avtomobil idxalı 22% və ya 9 min 392 ədəd artıb.

Qeyd edək ki, bu ilin ilk yarısında idxal olunan bir ədəd avtomobilin orta gömrük dəyəri 18 min 573 dollar (31 min 574 manat) olub.

Müqayisə üçün bildirək ki, ötən ilin eyni dövründə idxal olunan bir ədəd avtomobilin orta gömrük dəyəri 18 min 409 dollar (31 min 296 manat) olub.

Rəqəmlərdən də göründüyü kimi, bir ədəd avtomobilin orta gömrük dəyərində ötən ilin eyni dövrü ilə müqayisədə ciddi dəyişiklik olmayıb.

Qeyd edək ki, artım daha çox daxili yanma mühərriki ilə yanaşı, elektrik mühərriki ilə də hərəkətə gətirilən nəqliyyat vasitələrinin (hibrid) idxalında müşahidə olunub. Belə ki, bu ilin ilk yarısında xaricdən 23 min 1 ədəd hibrid avtomobil gətirildiyi halda, ötən ilin ilk yarısında bundan 2,6 dəfə az – 8 min 959 ədəd avtomobil gətirilib.

İdxal olunan bir ədəd hibrid avtomobilin orta gömrük dəyəri 20 min 563 dollar (34 min 957 manat) olub.//yeniavaz.com