O, Azərbaycanın ən bahalı futbolçusudur - FOTO

Azərbaycan klublarının, xüsusilə “Qarabağ”ın Avropada uğurları çoxaldıqca ölkə çempionatında top qovan futbolçuların da dəyəri artır. Hazırda Azərbaycanın ən bahalı futbolçusu “Qarabağ”ın gənc ulduzu Nəriman Axundzadədir. 22 yaşlı futbolçunun bazar dəyəri 2,5 milyon avrodor.

AJMEDİA.NEWS xəbər verir ki, əslən Lənkərandan olan Nəriman Axundzadə 23 aprel 2004-cü il Bakıda anadan olub. Lənkəranın tanınmış ustası Nəriman və hərbi polis mayoru Tofiq Mustafayevin nəvəsidir.

Axundovlar ailəsinin son beşiyi olan Nərimanın futbol karyerası "Xəzər-Lənkəran" klubundan başlayıb.

12-13 yaşından isə "Qarabağ"ın aşağı yaş klubunda futbol fəaliyyətini davam etdirib. Ona olan inamı doğrultmağa çalışan Nəriman tarixi oyunlarda həlledici qollara imza ataraq hər kəsin sevimlisinə çevrilib. 2013‑cü ildən klubun müxtəlif yaş qrupu komandalarında yetişən Nəriman 2022‑ci ildə əsas komandaya yüksəlib və ölkə çempionatında debüt edib.

Hazırda o, Azərbaycan Premyer Liqasında “Qarabağ” FK‑nin əsas hücumçularından biridir.

U-19 və U-21 yığmalarında Azərbaycanı təmsil edib.

Nəriman Avrokuboklarda ilk qolunu Avropa Liqasının 2023-2024 mövsümünün 1/16 final mərhələsində Portuqaliyanın “Braqa” klubunun qapısına vurub. Həmin oyunda “Qarabağ” Azərbaycanın futbol tarixində avrokubokların 1/8 finalına yüksələn ilk klub olub.

Gənc futbolçu 2022-ci ilin İslam Həmrəylik Oyunlarında Azərbaycan yığmasının heyətinə cəlb edilib. 2023-cü ilin noyabrından Azərbaycanın əsas millisində oynayır.

Nəriman Axundzadənin “Qarabağ”la 2028-ci ilə qədər müqaviləsi var.

Beynəlxalq İdman Araşdırmalar Mərkəzi 2024-2025 mövsümündə 21 yaşdan aşağı ən məhsuldar sağ vingerlər arasında Nəriman Axundzadəni dünyada 7-ci yerdə göstərib.