Netanyahu Trampla Qətərə növbəti hücumu müzakirə etmək istəyir

İsrail radikal Fələstinin HƏMAS hərəkatının liderlərini aradan qaldırmaq məqsədi ilə Qətərə növbəti dəfə hücum zərbəsi endirmək istəyir.

AJMEDIA.NEWS xəbər verir ki, İsrailin baş naziri Benyamin Netanyahu bunu "Fox News" telekanalına müsahibəsində bildirib. O, ABŞ prezidenti Donald Trampla Qətər ərazisinə növbəti zərbələr endirmək imkanını müzakirə etmək niyyətində olduğunu açıqlayıb.

O, Trampın İsrailin Qətərə qarşı yeni hücumlar etməyəcəyi ilə bağlı açıqlamasını şərh edərkən, "Bu barədə prezident Trampla danışacağam. Bunu burada etməkdənsə, orada etməyi üstün tuturam", deyə bildirib.

Netanyahu əminliklə qeyd edib ki, Doha zərbələrindən sonra ərəb ölkələrinin narazılığına baxmayaraq, İsrail və BƏƏ arasında normallaşma sazişləri qüvvədə qalacaq. O, bir daha hücuma görə özünü haqlı sayıb və bunun terrorizmlə mübarizə məqsədi daşıdığını bildirib.

Netanyahu hücumu ABŞ-nin 2011-ci ildə Əl-Qaidə lideri Usamə bin Ladenin Pakistanda məhv edilməsi əməliyyatı ilə müqayisə edib: "Düşünürəm ki, ABŞ və özünə hörmət edən hər hansı digər ölkə terrorçuları müdafiə etməyəcək. Və təbii ki, siz (ABŞ) Pakistana hücum etmədiyiniz kimi, biz də Qətərə hücum etmədik. Bin Ladeni məhv edəndə Pakistana yox, bin Ladenə hücum etdiniz. Amma bütün bunlar həll olunacaq, çünki bizim hədəfimiz HƏMAS idi və başqa bir şey deyil. Düşünürəm ki, bu məsələdə istənilən halda razılığa gələ bilərik".