Netanyahu: "İrandan qaynaqlanan "nüvə soyqırımı" riskini zərərsizləşdirə bildik"

Benyamin Netanyahu İsrailin İrandan qaynaqlanan "nüvə soyqırımı" riskini zərərsizləşdirdiyini bəyan edib.

AJMEDİA.NEWS məlumat verir ki, hökumət rəhbəri bu sözləri Yerusəlimdə terror qurbanları və müharibə şəhidlərinin xatirəsinə həsr olunmuş rəsmi anım tədbirində səsləndirib.

Baş nazir bildirib ki, Amerika Birləşmiş Ştatları və İsrailin İrana qarşı birgə hərbi addımları yəhudi dövlətinin mövcudluğuna yönəlmiş birbaşa ekzistensial təhdidi ləğv edib. O vurğulayıb ki, bu tədbirlər görülməsəydi, nüvə silahlarının tətbiqi nəticəsində İsrail Holokost səviyyəli bir faciə yaşaya bilərdi.

"İranın ayətullah rejimi yeni bir Holokost həyata keçirməyi nəzərdə tuturdu. Onlar nüvə bombaları və minlərlə ballistik raket vasitəsilə bizi Yer üzündən silmək üçün hazırlıq görürdülər.

Lakin bu ssenari reallaşmadı, çünki yaxın müttəfiqimiz ABŞ ilə əməkdaşlıq edərək İran rejiminin planlarını öncədən darmadağın etdik. Dövlətimizə qarşı yönəlmiş birbaşa mövcudluq təhlükəsini tamamilə ortadan qaldırdıq", - deyə o, əlavə edib.