Nəsimi Əbilov - "Yeni il, Yeni ümid, Roş Ha-Şananın Mənəvi Mesajı"

Düyada yəhudilərin ən mühüm və mənəvi bayramlarından biri olan Roş ha-Şana – yəni Yəhudilərin Yeni ili – yenilənmənin, saflaşmanın və gələcəyə ümidlə baxmağın rəmzidir.

Bu bayram yalnız təqvimdə yeni ilin başlanması deyil, həm də insanın öz daxili aləminə nəzər saldığı, mənəvi dəyərləri yenidən dərk etdiyi, ətrafındakı insanlara mərhəmət, xeyirxahlıq və sevgi ilə yanaşmağı xatırladan bir dövrdür.

Roş ha-Şana Yəhudi təqviminə görə Tișrei ayının birinci və ikinci günlərində qeyd olunur. Ənənəyə görə, bu günlərdə insanlar ibadət yerlərində, sinaqoqlarda toplaşır, Şofar sədaları altında dualar edir, yeni ilin daha xeyirli, bərəkətli və dinc keçməsi üçün arzular diləyirlər.

Bayram süfrələrində isə simvolik təamlar – balda batırılmış alma, xurma, nar, balıq başı və s. təqdim olunur. Bu nemətlər bolluq, şirinlik, uğur və ruzi-bərəkət diləklərinin ifadəsidir.

Bu mənalı bayram münasibətilə biz də, Azərbaycan Yəhudi Media Mərkəzi olaraq bütün dünya yəhudilərin, yəhudi icmaları üzvlərini ürəkdən təbrik edir, hər kəsə sağlamlıq, rifah, firavanlıq, sülh və xoşbəxtlik arzulayırıq. Qoy yeni başlanğıclar ili olan Roş ha-Şana hər biriniz üçün yeni ümidlər, uğurlar və xeyirxah işlərin təməlini qoysun.

Bütün dünya xalqlarının sülh və tolerantlıq şəraitində birgəyaşayış ənənələrinin möhkəmlənməsi, dostluq və qarşılıqlı hörmətin daha da güclənməsi arzusu ilə – Şana Tova Umetuka!

Yeni iliniz mübarək olsun!

Nəsimi Əbilov

Azərbaycan Yəhudi Media Mərkəzi Direktor