Meloniyə də evlənmək üçün 100 baş inək təklif etmişdi
14 Aprel 2026 11:48 | Baxış sayı: 101
Uqanda Prezidenti Yoveri Museveninin oğlu, ölkə silahlı qüvvələrinin komandanı general Muhozi Kaineruqaba Türkiyədən 1 milyard dollar təzminatla yanaşı, “ölkənin ən gözəl qadını”nı həyat yoldaşı kimi tələb edib.
AJMEDİA.NEWS-un məlumatına görə, sözügedən çıxışı ilə dünya gündəminə düşən general bundan bir neçə il öncə də analoji fikirlər səsləndirərək böyük müzakirələrə səbəb olmuşdu.
Belə ki, generalın Türkiyəyə qarşı qoyduğu qeyri-adi şərt əslində onun “diplomatik evlilik” təklifləri silsiləsinin davamıdır.
Hələ 2022-ci ilin oktyabr ayında Kaineruqaba İtaliyanın Baş naziri Corciya Meloni ilə evlənmək istədiyini açıq şəkildə bəyan etmişdi.
O, Roma qarşısında olduqca qəribə bir təklif qoyaraq, Meloni ilə evlənmək müqabilində ona “yer üzünün ən gözəl inəkləri” adlandırdığı 100 baş “Ankole” cinsli inək verməyə hazır olduğunu bildirmişdi. General həmin vaxt İtaliya Baş nazirinə qarşı nümayiş etdirdiyi bu “maraqlı” münasibəti indi Türkiyəyə qarşı daha kəskin ritorika və maliyyə tələbi ilə davam etdirir.
Xatırladaq ki, generalın son çıxışı əvvəlkilərdən daha hədə-qorxu dolu xarakter daşıyır. O, Türkiyəni Somalidəki layihələrdən mənfəət əldə etməkdə günahlandıraraq, 1 milyard dollar ödənilməyəcəyi təqdirdə diplomatik əlaqələri kəsəcəyini və Türkiyənin Kampaladakı səfirliyini bağlayacağını bildirmişdi.
